A Deputación de Lugo abrirá web de turismo con todos os recursos e atractivos da provincia
xoves, 13 de xullo do 2017
- A ponte da vila de Navia de Suarna, nos Ancares
Onte presentouse
na sede da Deputación o Plan Estratéxico de Lugo 2017-2020,
unha iniciativa artellada baixo o slogan Lugo Cambia e que
centra boa parte das súas liñas de traballo no turismo etnográfico,
de natureza e de cultura. Segundo se fixo saber na cita, na que
participaron a maior parte dos alcaldes dos 67 concellos da
provincia, no desenvolvemento de plan participaron máis de 250
axentes de Lugo. Como dixemos, unha parte importante da iniciativa
centra os seus obxectivos no turismo: en potenciar os múltiples
atractivos da provincia ao tempo que se clarifica a información,
faise marca e incídese en impulsar a provincia a través das novas
tecnoloxías dixitais.
Por unha banda, establécense cinco xeodestinos:
Lugo-Terra Cha (para impulsar o turismo da auga, o patrimonio
arqueolóxico, o ecoturismo ou o turismo agroalimentario); a cidade
de Lugo (para visualizar as súas pegadas romanas, as súas grandes
festividades, o termalismo ou o turismo accesíbel), A Ribeira Sacra
(impulsando as súas potencialidades no ecoturismo, no patrimonio
arquitectónico ou no turismo fluvial), A Mariña (potenciando os
seus atractivos como destino litoral, a gastronomía, o turismo
mariñeiro e os grandes acontecementos), e Ancares-Courel (apostando
aquí polo turismo científico, o etnográfico e o ecoturismo).
A respecto de todo isto, a Deputación de Lugo
creará páxina web de turismo onde se poderán atopar os recursos
patrimoniais, naturais e culturais da provincia. Ademais, nela será
posíbel achar paquetes gastronómicos, rutas de sendeirismo e
escapada, recomendacións e informacións de interese. Segundo
explicou o presidente da Deputación, Darío Campos, “poremos en
marcha un plan de sinalización vinculado ás novas tecnoloxías,
mellorando a accesibilidade aos recursos turísticos da provincia, e
tamén impulsaremos eventos relacionados coa gastronomía coa
creación duns premios provinciais e unha ruta gastronómica na
provincia”. Asemade, crearase unha gran axenda cultural, engadiu.