A Deputación de Lugo entrega os diplomas aos nosos novos talentos dos contidos audiovisuais
martes, 22 de xuño do 2021
O
presidente da Deputación de Lugo, José
Tomé Roca, entregou este martes 22 de xuño os diplomas da 17ª
promoción dos ciclos de Realización e Produción do Centro de
Formación do Servizo de Audiovisuais da institución provincial,
a antiga Fundación TIC. Un total de 23 alumnos e alumnas puxeron fin
a súa formación co acto que tivo lugar no salón de actos do Pazo
de San Marcos e no que participou tamén o deputado de Promoción
Económica e Social, Pablo Rivera Capón.
O
presidente lembrou que a institución provincial adicada cada ano 1,5
millóns de euros ao funcionamento do Centro de Formación de
Audiovisuais, un espazo referente a nivel galego e estatal en materia
de creación de contidos e novas tecnoloxías da información.
Tomé
sinalou tamén que a Deputación de Lugo traballa para que o alumnado
“saia do noso centro coa mellor formación e para que, con eses
coñecementos, poida entrar con máis garantías no mercado
audiovisual, un sector que cada vez ten máis peso na nosa provincia
e en Galicia, e que require de bos profesionais”. Asemade, defendeu
un modelo de formación da Deputación que posibilita “as prácticas
en escenarios reais”, nunha “aposta decidida por unha formación
pública de calidade e accesíbel a todos os mozos e mozas con
vocación audiovisual, independentemente da situación económica das
súas familias”. Neste sentido, puxo en valor o traballo dos
estudantes de 1º dos ciclos de Produción e Realización encargados
da organización e a retransmisión do acto vía streaming a
través da canle de YouTube do Servizo de Audiovisuais da Deputación.
O
acto incluíu, ademais da entrega de diplomas, a proxección de dous
vídeos: un cunha compilación dos traballos elaborados polos 23
titulados e tituladas da XVII Promoción do Centro de Formación
Audiovisual, e outro cos mellores recordos que teñen da Escola.
José
Tomé avanzou que o curso que vén a matrícula continuará a ser
gratuíta. Dende este mércores, 23 de xuño, e ata o 2 de xullo,
estará aberto o prazo de prescrición. O período da matrícula será
do 14 ao 30 de xullo. Na
páxina web provincial os interesados poden acceder a toda a
información sobre os ciclos audiovisuais da Deputación.