A Galipedia lanza un concurso fotográfico para achegar imaxes libres aos artigos das parroquias
xoves, 27 de xuño do 2019
A
comunidade da Galipedia quere seguir cubrindo os posíbeis baleiros
da enciclopedia galega online. Un destes baleiros é o déficit
de imaxes libres que acompañen os artigos de parroquias de Galicia
que non teñen foto. Con este obxectivo e coa finalidade de seguir
facendo fincapé na necesidade de facermos fronte común para ter a
máis completa Galipedia posíbel, o equipo de mantedoras e
mantedores da enciclopedia vén de convocar un concurso fotográfico
de lugares da nosa xeografía para engadir aos devanditos artigos
locais. O
certame chámase Wiki Loves Parroquias. Segundo os
responsábeis da iniciativa, neste intre hai uns 700 artigos de
parroquias sen imaxe.
“As
imaxes son fundamentais para ilustrar os artigos xa que achegan un
alto valor ós contidos; que cada parroquia de Galicia teña a súa
foto é subir un pequeno chanzo no incremento da calidade da
enciclopedia libre”, sinalan dende a comunidade, engadindo que as
fotografías que se procuran son de todos os tipos: castros,
petróglifos, torres, igrexas, mosteiros, pazos, ríos, regatos,
lagoas, fontes, serras, montes, outeiros, fragas, carballeiras,
árbores senlleiras, festas, romarías, feiras...
Os
únicos requisitos son: que non haxa fotos no artigo en cuestión ao
comezo do concurso, que as fotos se suban a Wikimedia Commons cunha
licenza libre, que se amose unha imaxe que se poida identificar que é
da parroquia, e que se propoña na listaxe de fotos participantes.
O
prazo de presentación das fotos comeza o 1 de xullo e remata o 31 de
outubro, e durante o mes de novembro escolleranse as fotos gañadoras.
Os
premios son: 300 euros para a mellor foto, 200 para a segunda e 100
para a terceira, e a maiores, hai un sorteo de camisetas da Galipedia
entre tódolos participantes.
Podemos
consultar tódolos detalles en https://w.wiki/52e.
Nesta páxina tamén podemos acceder ás listaxes de artigos de
parroquias que están pendentes de ilustrar, todas elas nas
provincias de Lugo e Ourense xa que as provincias de Coruña e
Pontevedra xa teñen todas algunha imaxe. Nesa páxina están
dispoñíbeis tamén as ligazóns ás listas de parroquias sen foto
coas súas coordenadas para facilitar a súa localización.