A Nintendo Switch chega aos 20 millóns de consolas vendidas

martes, 31 de xullo do 2018 Marcus Fernández

Nintendo vén de publicar os seus resultados financeiros correspondentes ao segundo trimestre do ano, confirmando a boa saúde da Nintendo Switch, consola que está a superar sobradamente á súa predecesora, a Wii U. A compañía nipoa tamén deu conta das vendas dalgúns lanzamentos do pasado trimestre, no que Donkey Kong Contry: Tropical Freeze vendeu 1,4 millóns de unidades, Mario Tenis Aces vendeu 1,38 millóns de unidades (e iso que saíu no mes de xuño) e incluso Nintendo Labo conseguiu colocar 1,39 millóns de unidades en todo o mundo (pese ás críticas iniciais que apuntaban que o produto de cartón era demasiado caro).
Nun plano máis secundario quedan outras consolas como a familia Nintendo 3DS, que no seu 8º ano vendeu 0,36 millóns de unidades e 2,95 millóns de xogos (a metade que o ano pasado) dando a impresión de que a Nintendo Switch está a tomar o relevo de xeito conxunto tanto da Wii U como da 3DS ao poder funcionar como consola doméstica e portátil. Tamén foron importantes as vendas do relanzamento da NES mini, que vendeu 1,26 millóns de unidades pese a non estarmos na campaña de Nadal, confirmando o atractivo deste tipo de produtos retro.
No ámbito dixital, Nintendo facturou 18.500 iens en descargas para Nintendo Switch e 9 mil millóns de iens nos seus xogos para dispositivos móbiles (Super Mario Run, Fire Emblem Heroes e Animal Crossing: Pocket Camp).
Este balance de Nintendo tamén serve para saber cal é o seu parque actual de consolas, de xeito que a 30 de xuño temos que o número de unidades de Nintendo Switch sería de 19,67 millóns de unidades, acompañadas por 86,93 millóns de xogos vendidos, volume realmente notable se temos en conta que a consola levaría só 16 meses no mercado e a súa predecesora, a Wii U, en 5 anos só tería vendido 13,56 millóns de consolas e 102,28 millóns de xogos.
Se analizamos os xogos, resulta evidente que en Switch están a arrasar as franquías de Nintendo, con Super Mario Odyssey vendendo 11,17 millóns de copias dende o seu lanzamento, Mario Kart 8 Deluxe con 10,35 millóns de copias e The Legend of Zelda: Breath of the Wild con 9,32 millóns de copias. En cuarta posición en vendas conseguiuse coar unha franquía relativamente nova, xa que Splatoon 2 conseguiu vender 6,76 millóns de unidades, o que ten especial mérito por ser basicamente un port da versión de Wii U, polo que a serie aínda podería dar moitas sorpresas no futuro e converterse no grande xogo competitivo que Nintendo persegue.

PUBLICIDADE