A USC achega un máster referencial a nivel español sobre as posibilidades de investigación e de negocio do Big Data
luns, 15 de xuño do 2015
A Universidade de
Santiago e a Universidade de Murcia están a organizar unha
actividade formativa que salienta pola temática tratada (de gran
interese e potencial para os novos vindeiros profesionais TIC) e
tamén polo papel que representa a actividade no panorama educativo
estatal: trátase dun dos primeiros másteres verificados a nivel
español pola Axencia Nacional de Avaliación da Calidade e
Acreditación, ANECA. Falamos do Máster
Interuniversitario en Tecnoloxías de Análises de Datos Masivos: Big
Data, que impartirán de xeito conxunto a USC e a UMU a partir do vindeiro ano académico (2015-2016). Esta
achega formativa, amais do devandito, xa foi recoñecida polo
Consello de Universidades como máster oficial na temática de Big
Data.
Segundo nos informan
fontes do centro tecnolóxico CiTIUS (na imaxe, no Campus Vida compostelán), as clases comezarán a principios de setembro de
2015, e servirán para debullar un completo plan de estudos no que
participou o persoal académico da USC e a UMU e tamén numerosos
profesionais da industria e os distintos colexios profesionais
ligados á informática e as novas tecnoloxías. O máster consta dun
único curso académico (60 ECTS), dividido en tres grandes bloques
formativos: Big Data, Ciencia de Datos e Aplicacións de
Negocio.
Os alumnos deberán
presentar un proxecto de fin de máster tutelado por profesionais de
empresas, centros de investigación ou universitarios.
A actividade formativa
vén auspiciada tamén por un prestixioso e referencial elenco de
colaboradores e asesores externos, entre os que se contan firmas
galegas como Coremain, AVA ou Plexus, ás que cómpre engadir
compañías do talle de HP e Everis e entidades profesionais como o
Colexio Profesional de Enxeñería en Informática de Galicia, o
Instituto Tecnolóxico para ou Control de Medio Mariño de Galicia, o
Colexio Profesional de Enxeñeiros Técnicos en Informática da
Rexión de Murcia ou o Centro de Supercomputación de Galicia
(CESGA).
Polo que se refire aos
destinatarios do máster, desde a área de coordinación do mesmo
sinalan que se determinou un “perfil de acceso amplo”. Na área
participa (entre outros) David Losada Carril, profesor da ETSE
(Escola Técnica Superior de Enxeñaría da USC) e investigador do
CiTIUS, que informa que o obxectivo é “atraer a estudantes
procedentes de Enxeñaría informática, Matemáticas, Física ou
outras enxeñarías afíns”.Con respecto aos medios técnicos, o
sistema empregado para permitir a actividade docente -asumida por
ambas as universidades- será o da videoconferencia, coa finalidade
“de facilitar a interacción e a claridade expositiva”.