A Wii U só vendeu 160.000 unidades no segundo trimestre do ano

mércores, 31 de xullo do 2013 Marcus Fernández

Nintendo publicou nas últimas horas os seus resultados financeiros correspondentes ao segundo trimestre do ano (dispoñibles en formato PDF), rexistrando unha caída interanual de ingresos de só o 3,8%, o que pode sorprender ante o desastroso funcionamento comercial da súa nova consola doméstica, a Wii U, que só vendeu nese período 160.000 unidades (das que 90.000 corresponderían ao Xapón e 60.000 a EE.UU., o que deixaría para o mercado europeo unhas vendas ridículas). Por fortuna, a compañía xaponesa está a ter mellores resultados co Nintendo 3DS, e no que respecta aos xogos continúa a ter unhas vendas moi sólidas.
Como exemplo dos grandes éxitos de Nintendo no segundo trimestre do ano temos que Animal Crossing: New Leaf superou os 3 millóns de unidades vendidas (principalmente no Xapón, pois ao resto do mundo non chegou ata xuño); o xogo de Luigi’s Mansion 2, pese a chegar ao mercado no trimestre anterior, conseguiu vender 1,43 millóns de unidades, sendo tamén moi ben recibido Donkey Kong Country Returns 3D; ou sexa, que Nintendo segue a ser o rei nas consolas portátiles, vendendo o pasado trimestre 1,4 millóns de 3DS e 11,01 millóns de xogos para a mesma.
Curiosamente a vella Nintendo DS continúa viva, aínda que con só 60.000 unidades vendidas e 2,15 millóns de xogos; algo semellante está a pasar coa Wii, que pese a ter sucesora, aínda vendeu 210.000 unidades e 3,67 millóns de xogos a nivel mundial (superando sobradamente á nova Wii U).
Teriamos así que Nintendo está a conseguir uns resultados positivos grazas á 3DS, mentres que a Wii U está a ser un importante lastre por culpa das súas reducidas vendas de hardware, que tamén afasta ás compañías editoras de videoxogos de apostar por tal consola, o que está a convertela nunha plataforma que sobrevive unicamente grazas a xogos da propia Nintendo.

PUBLICIDADE