A multinacional Enterasys recoñece o labor da empresa galega Emetel

Manuel Lago, director xeral da firma, nunha imaxe de Xornal

Emetel, empresa galega centrada na achega de sistemas de redes e comunicacións, vén de ser obxecto dun importante recoñecemento á súa actividade. Trátase do Premio ao Mellor Partner Rexional en España, que vén da man da empresa Enterasys. O galardón foi dado a coñecer no transcurso dun evento profesional convocado por esta compañía, a Enterasys EMEA Advantage Partner Conference, un evento no que participan preto de 150 socios da empresa convocante, os principais directivos da mesma e un bo número de expertos en innovación, mercados TIC e novas tendencias.
Segundo informa Emetel, o recoñecemento salienta o labor feito pola firma galega como socio destacado da compañía estadounidense, que está á cabeza do panorama TIC internacional en materia de seguridade tecnolóxica, con servizos e achegas que a propia Emetel xa integrou e afianzou no seo de institucións e empresas como a Administración autonómica, Navantia ou Adolfo Domínguez. Segundo nos conta o xerente de Emetel, Manuel Lago, ao fío deste galardón e do que significa para a compañía galega, estamos a falar dun auténtico éxito. En primeiro lugar, comenta, “porque pon en valor o traballo que levamos desenvolvendo dende hai anos con eles, unha estreita colaboración que nos levou a empregar as súas solucións en proxectos de primeira liña para empresas e institucións galegas e, en segundo lugar, porque Enterasys é recoñecida polo sector como a empresa líder en solucións de seguridade tecnolóxica”.