A viguesa SIVSA implanta Hosix en tres dos cinco mellores hospitais públicos de Marrocos
mércores, 15 de xaneiro do 2020
A
empresa galega SIVSA, centrada en servizos tecnolóxico-dixitais
avanzados, comezou o ano dando un novo e importante paso en materia
de internacionalización. Segundo informan fontes da compañía TIC
de Vigo, esta
foi quen de afianzar o seu liderado en Marrocos coa implantación do
seu software de xestión hospitalaria Hosix en tres do cinco
hospitais universitarios máis prestixiosos do sistema de saúde
público do país, cunha cobertura de poboación potencial de até
12 millóns persoas.
Trátase
dos centros hospitalarios universitarios (CHU) de Fez, Marrakech e
Oujda, os dous primeiros, informa SIVSA, “situados entre os centros
de maior calidade sanitaria e médica do norte do país”, e nos que
SIVSA optimizou de maneira gradual (e ao longo do últimos dez anos)
a xestión dos seus procesos.
“Os
CHU”, engade a empresa galega, “ocupan o nivel máis alto na
xerarquía hospitalaria de Marrocos, que se estrutura en hospitais
universitarios, rexionais, provinciais, locais e centros de saúde, e
dende os que só se atenden aqueles casos que, pola súa
complexidade, non poden ser resoltos previamente nos niveis
inferiores de atención e que poden provir, non só das súas áreas
de influencia directa, senón de calquera das doce rexións nas que
se divide o país”.
Ás
historias clínicas e preto de 3.000 camas que SIVSA xestiona con
Hosix nos CHU de Fez, Marrakech e Oujda, cómpre engadir as máis de
360 pertencentes ao hospital Sheikh Zaïd e as dos tres hospitais da
súa fundación (hospital multidisciplinario de Khouribga, Youssoufia
e Benguerir) nos que tamén se integrou a plataforma cos seus
sistemas de información.
Hosix,
lembra a firma viguesa, é unha solución composta por diferentes
módulos asistenciais e administrativos que funcionan de maneira
autónoma, pero “que permiten xestionar de forma global a
información, os procesos e os fluxos de traballo das diferentes
áreas hospitalarias”. Facilita a explotación dos datos, a
comunicación e colaboración entre profesionais e organización e o
acceso á historia clínica do paciente, axilizando a toma de
decisións e optimizando, a eficiencia e a calidade de servizo
prestado.