Advirten de que as copias promocionais de Killzone 2 non permiten o xogo en rede

mércores, 11 de febreiro do 2009 Marcus Fernández

O vindeiro 27 de febreiro chegará ás tendas o agardado xogo Killzone 2, que promete ser o título que mellor aproveite a potencia gráfica da PlayStation 3 ata o momento, o que levou a algúns aproveitados a vender a través de eBay e outras canles de distribución copias previas do xogo a prezos realmente esaxerados, o que levou a Guerrilla Games a advertir de ser copias da versión que se distribuíu entre a prensa «é posible que non se poida xogar ao modo multiusuario con estas edicións» o que claramente frustraría ao consumidor que pagase un sobreprezo para facerse cun xogo antes da súa data oficial de lanzamento.
As copias promocionais que se distribúen entre a prensa especializada tamén inclúen claramente o texto «not for resale», ou sexa, que está prohibida a súa venda, polo que os vendedores destas unidades estarían a cometer unha infracción.
Dende CVG aseguran que nas copias promocionais que puideron probar non foi posible xogar en rede, o que confirmaría as declaracións de Guerrilla, aínda que apuntan que isto podería ser consecuencia de que os servidores do xogo tampouco estarían operativos ata o lanzamento oficial do mesmo. Sexa como fora, queda claro que gastar 2 ou 3 veces o prezo de portada dun xogo para conseguir unha copia promocional que podería estar limitada non parece un bo negocio para os usuarios finais.

PUBLICIDADE