Airis renova a súa gama de ordenadores Xtreme, deseñados para xogar

A firma de informática e electrónica de consumo, Airis, vén de renovar a súa gama Xtreme de ordenadores portátiles e de sobremesa, pensada especificamente para os usuarios de xogos e profesionais da edición por contar cunhas características técnicas moi específicas que garanten “o alto rendemento dos equipos” cando se empregan xogos 3D ou programas de deseño e de edición de vídeo.
Este tipo de ordenadores admiten distintas configuracións para facilitarlle a cada usuario o modelo que mellor se axusta ás súas necesidades tanto para os momentos de lecer como para levar a cabo as tarefas profesionais.
O portátil Airis Xtreme N1700 conta con tecnoloxía de procesador Intel Centrino Duo baseada en procesadores Penryn (Santa Rosa Refresh) que supoñen unha evolución dos Core 2 Duo e están fabricados con tecnoloxía de 45 nm que achegan velocidades superiores aos 3 GHz.
Asemade, presenta a meirande capacidade de procesamento gráfico dispoñible xa que inclúe de serie “o primeiro procesador gráfico con DirectX 10 do mundo destinado a portátiles de altas prestacións”.
Conta cunha pantalla TFT panorámica Black Pitch de 17 polgadas na que se pode traballar cunha resolución WUXGA de 1920x1200 píxeles.
Por outra banda, os modelos de ordenadores de sobremesa que forman parte da familia Gamer Xtreme son dous: Airis Gamer Xtreme BJ-X 10/04 e Airis Gamer Xtreme BJ-X 12/04. Ámbolos dous dispoñen de 4GB de memoria RAM DDR2 en Dual Channel e capacidade de Disco Duro de 1TB. Asemade inclúen regravadora DVD-R/RW con LigtSribe, teclado multimedia especial para xogos e rato óptico Airis, sintonizadora de TV dixital, tarxeta de rede sen fíos, un sistema de ventilación especial que pode ser regulado dende o panel frontal do equipo e accesorios para os afeccionados aos videoxogos como son varios títulos, un volante e game pad.
O prezo destes equipos varía (segundo o modelo) entre os 1.500 e os 2.100 euros IVE incluído.