Angry Birds supera os 500 millóns de descargas

mércores, 2 de novembro do 2011 Marcus Fernández

Nos últimos meses son moitas as novas que temos comentado sobre a franquía Angry Birds, pois este divertido xogo móbil non parou de saltar entre distintas plataformas e estrear tanto novos títulos como actualizacións que ampliaban os seus contidos, e hoxe no evento Slush 2011 que está a ter lugar en Finlandia, Peter Versterbacka de Rovio confirmou que nestes dous anos Angry Birds superou os 500 millóns de descargas, converténdose no xogo de maior crecemento e maior volume de descargas da historia.
Cómpre destacar que hai un par de semanas Andrew Stalbow, director de Rovio para Norteamérica, aproveitou a súa participación no congreso Web 2.0 para anunciar que Angry Birds superara os 400 millóns de descargas, polo que sumar 100 millóns de descargas en tan pouco tempo é todo un logro con especial mérito ao considerar que a compañía detrás do título non precisa investir en publicidade para disparar o uso do seu xogo.
Actualmente están dispoñibles para a súa descarga os xogos Angry Birds, Angry Birds Seasons e Angry Birds Rio, e dous destes títulos actualizáronse con novas fases hai pouco (incluso estreando un novo paxaro en Angry Birds Seasons), de aí que continúen a captar a atención dos millóns de seguidores en todo o mundo.


Rovio celebra os 500 millóns de descargas cun vídeo

PUBLICIDADE