Ardán pon en descarga a base de datos coas 20.000 maiores firmas galegas
xoves, 18 de febreiro do 2016
O Consorcio da Zona
Franca, a través do seu sistema de información empresarial (Ardán)
vén de pór na Rede, a disposición dos seus usuarios, a
base de datos descargábel (o Informe Ardán) que abrangue a relación
das 20.000 empresas galegas de meirande facturación en 2014. A
base de datos, que é de pago, será o alicerce os vindeiros meses do
Informe Económico e de Competitividade de Galicia (investigación
que se poderá conseguir de balde e que vén da man de Ardán e a
Universidade de Vigo). En setembro editaranse en papel ambas as
seccións (base de datos e informe económico). Segundo o Consorcio,
o libro resultante será, como as anteriores edicións, “un
referente no estudo e análise da economía de Galicia”.
A entidade viguesa engade
que base de datos posta esta semana en descarga pódense obter datos
totalmente exportábeis a Excel, “o que permite traballar con eles
en calquera computador e realizar múltiples filtros por nome de
empresa, económicos, sectoriais, xeográficos, etc”. A base tamén
permite a selección de listaxes ou fichas de empresa nun formato
descargábel con software para a contorna Windows. Nos datos que se
proporcionan de cada empresa tamén se fai constar se ten algún dos
indicadores Ardán de mellores prácticas (alto rendemento, alta
produtividade, xeradora de riqueza, ben xestionada,
internacionalizada, empresa innovadora) e outros indicadores
(auditada, certificación de calidade, certificación ambiental,
exportadora).