A empresa galega imaxin|software e a portuguesa Priberam remataron a integración de varios pares de idiomas da plataforma Opentrad no software de tratamento de vídeo plainX que, segundo indican, “permite a transcrición, tradución, subtitulado e dobraxe automática empregando avanzadas técnicas de Procesamento de Linguaxe Natural e de Intelixencia Artificial”. Imaxin engade que este proxecto abeirase á colaboración mantida dende hai anos entre ambas dúas empresas, especializadas neste tipo de solucións, colaboración que será ampliada no futuro con novos proxectos en común.

A Deputación da Coruña vén de recibir 3,1 millóns de euros de fondos europeos para impulsar a dixitalización da administración local na provincia, concedidos dentro da convocatoria do Ministerio de Política Territorial para proxectos de modernización e dixitalización das entidades locais, forman parte do Plan de Recuperación, Transformación e Resiliencia do Goberno de España, financiado pola Unión Europea- Next Generetion EU.

A empresa ABN Pipe, con sede na Coruña e dedicada á fabricación de sistemas de tubaxes e compostos de materiais termoplásticos para os sectores da edificación, a obra civil e a industria, recibiu este martes 6 de xuño o Premio Peme do Ano 2023 da Coruña, un galardón que conceden o Banco Santander e as Cámaras de Comercio da Coruña e Santiago de Compostela, en colaboración coa Cámara de España e o diario La Voz de Galicia.

O Colexio de Enxeñeiros Industriais de Galicia (ICOIIG) en colaboración coa Asociación de Enxeñeiros Industriais de Galicia (AIIG) entregará os galardóns da quinta edición dos Premios Galicia de Industria o vindeiro venres, 16 de xuño, no Palacio da Ópera da Coruña. Haberá seis categorías, ás que se presentaron un total de 14 empresas. Nelas recoñécense as mellores traxectorias, o fomento e implantación de boas prácticas no campo da industria, así como as contribucións realizadas polos profesionais ou entidades.

En febreiro Orange puxo en marcha a súa rede de telefonía móbil 5G SA (Stand Alone), o que moitas veces se define como 5G de verdade, pero que o operador galo promociona como 5G+, e agora fan balance desta despregadura para asegurar que son a única rede deste tipo que chegará a 30 localidades no primeiro semestre do ano.

O Colexio Profesional de Enxeñaría en Informática de Galicia (CPEIG) vai distinguir co Premio Colexiada/o de Honra a Amparo Alonso Betanzos, catedrática de Ciencias da Computación e Intelixencia Artificial na Universidade da Coruña (UDC) e investigadora do Centro de Investigación TIC (CITIC) da UDC.

Vitae vainos achegar un verán completo de actividades formativas para comezar o vindeiro curso con recursos plenamente actualizados. No extenso paquete de propostas que a consultora galega pon a disposición das e dos profesionais TIC atopamos unha actividade que sitúa o punto de mira nos equipos humanos e en como formar os mellores cadros de persoas nunha empresa. Trátase do novo curso People Analytics. A arte de xestionar persoas convertida en Ciencia, de seis horas de duración. Celebrarase en dúas xornadas, os días 28 e 29 de xuño, en formado de aula virtual en directo.

A Cámara de Comercio de Santiago ofrécenos esta semana (o xoves 8 en formato exclusivamente presencial) unha nova oportunidade formativa para avanzarmos en transformación: a xornada Como dixitalizar unha empresa e non morrer no intento. A finalidade deste obradoiro é facilitar o proceso de transformación nas pemes da contorna compostelá e, tamén, poñer o foco nas grandes vantaxes destes procesos, que abren grandes oportunidades ás empresas, sobre todo en medre de ingresos, aforro de custes, melloras en calidade ou competitividade.

O portal de divulgación Proxector, impulsado polo Consello da Cultura Galega (Centro de Documentación Sociolingüística de Galicia) e a USC para achegar á mocidade contidos divulgativos e científicos en galego, achéganos este mes de xuño un novo especial sobre sustentabilidade e novos xeitos de producir. Un planeta sen plástico é o título da nova entrega de Proxector.

As e os estudantes interesados nas carreiras tecnolóxicas terán este sábado 10 de xuño a oportunidade de coñecer en primeira persoa a Escola Superior de Enxeñaría Informática (ESEI) do Campus de Ourense, as súas instalacións, titulacións e servizos. Será na celebración da súa xornada de portas abertas, dirixidas a futuro novo alumnado universitario e ás familias interesadas.

O congreso para desenvolvedores de Apple, a WWDC23, botou a andar hoxe coa vista posta na súa presentación inaugural, unha das de maior duración que poden lembrarse, e que aparte das habituais novidades de software e hardware, incluíu finalmente unha One More Thing, reservada como guinda do pastel, e que consistiu no moi rumoreado casco de realidade aumentada da compañía de Cupertino.

Durante a conferencia de apertura da WWDC23, Tim Cook saíu ao escenario a presentar One More Thing, o que resultou ser o casco de realidade aumentada Apple Vision Pro, que a compañía da mazá describe como un revolucionario ordenador espacial que achega contido dixital ao mundo físico á vez que permite estar presente e conectar cos demais.

O director do IGAPE, Fernando Guldrís, visitou este luns 5 de xuño, en Porto do Molle (Nigrán), as instalacións de Gaictech, empresa de fabricación de maquinaria para o sector conserveiro e do conxelado que implementou, grazas ao programa de Dixitalización Industria 4.0, unha xestión integral tecnolóxica do seu proceso produtivo. Isto permitiulle acadar unha maior eficiencia e control desde o pedido do cliente até o subministro, pasando pola compra do material, o seu almacenamento e o corte láser do mesmo.

Este mércores 7 de xuño o Coworking Compostela Dixital (Cámara de Comercio de Santiago) vai organizar unha xornada en liña sobre metodoloxías e recursos dos que botar man para formar un grupo axeitado de profesionais para a nosa empresa ou emprendemento. A actividade Como atraer e reter talento na empresa? A importancia do equipo celebrarase ás 15.30 horas deste mércores e terá unha duración de 3 horas.

O Proxecto Nós, integrado pola Xunta (Consellería de Cultura e Educación, Secretaría Xeral de Política Linguïstica), o Instituto da Lingua Galega (ILG) e o centro CiTIUS da USC, celebrou este luns 5 de xuño a presentación dos detalles das súas tres primeiras ferramentas: ferramentas destinadas a facilitar a integración da lingua galega no ámbito da Intelixencia Artificial e das tecnoloxías disruptivas. O encargado de dar a coñecer os proxectos foi o conselleiro de Cultura, Educación, FP e Universidades, Román Rodríguez. Trátase, dixo, “de 3 aplicacións sen precedente en Galicia que permitirán a interacción en lingua galega entre as persoas usuarias e os dispositivos tecnolóxicos”.

Alumnado do grao en Robótica e investigadores do grupo de innovación docente XuvenCiencia do Campus Terra da USC presentaron proxectos de innovación tecnolóxica e kits de experimentación científica na última edición da Maker Faire Galicia, o evento argalleiro-tecnolóxico celebrado esta finde en Santiago, na Cidade da Cultura, no que participaron empresas, estudantes e milleiros de visitantes atraídos pola innovación tecnolóxica.

Ante a convocatoria de Eleccións Xerais para o vindeiro 23 de xullo son moitos os cidadáns que queren solicitar o voto por correo, e para evitar ter que acudir dúas veces ás oficinas de Correos (unha para solicitar o voto e outra para entregalo) queren realizar a solicitude dende o fogar a través da Internet, para o que precisan dun DNI electrónico ou dun certificado dixital válido, o que en moitos casos tamén precisa desprazamentos para identificarse, por exemplo, nunha oficina da Seguridade Social, pero este trámite presencial pode agora evitarse grazas ao novo procedemento de obtención do certificado dixital da Fábrica Nacional de Moeda e Timbre con identificación a través de vídeo.

Os directores xerais de PuntoGal, Darío Janeiro e o dos desenvolvedores de Opentrad, imaxin|software , Diego Vázquez, asinaron un convenio de colaboración co obxectivo de fomentar o uso do galego no entorno dixital. Mediante este acordo búscase aproveitar os avances en tradución automática en relación co galego para incorporar esta lingua ás páxinas web con dominio PuntoGal.

Unha nova edición das Xornadas Tecnolóxicas R celebrarase o martes 13 de xuño na Finca Montesqueiro, en Oleiros (A Coruña), onde se reunirán profesionais e altos responsables de empresas para escoitar as reflexións de expertos sobre os profundos cambios que o noso mundo experimentou nos últimos anos.

DATAlife Hub de Innovación Dixital (DIH) para as Ciencias da Vida de Galicia celebrou en Santiago a súa sexta asemblea xeral ordinaria, onde destacou os logros alcanzados desde a súa creación en 2019. DATAlife é un dos dous hubs de innovación dixital estratéxicos impulsados pola Xunta para contribuír á transformación dixital das pemes galegas. Neste sentido, a Administración autonómica, a través da Axencia Galega de Innovación (GAIN) destacou a “importancia de DATAlife como entidade capaz de mobilizar ao ecosistema, dende os centros tecnolóxicos e universidades ata as pemes, que son as que máis apoio necesitan en dixitalización”.