As novas plataformas de comunicación e o papel que xoga nelas o galego, polo miúdo nunha xornada do CCG

O Consello da Cultura Galega vai avaliar o presente e o futuro do galego nas plataformas de comunicación. Farao nunha xornada este 25 de maio, a partir das 19.00 horas, que contará con algúns dos principais protagonistas da cada vez máis ampla comunidade de galegas e galegos que “vive e traballa en Internet”, como Esther Estévez, Agos Reigosa, John Amil e María Saborís.
Tocaranse cuestións como o auxe dos podcast, a explosión do streaming a través de Twitch, o foro moderno de Discord ou a capacidade humorística dos memes. Tamén se abordará o papel que xoga a lingua galega nestes fenómenos.
A cita titúlase Novas plataformas de comunicación. O galego vive nas Redes e está coordinada polo xornalista Carlos Pereira. Poderá seguirse en directo desde a web e as redes sociais do Consello da Cultura Galega (CCG).
Como dixemos, na xornada participan catro das figuras máis destacadas da comunidade galega na Rede: Esther Estévez, xornalista que está a realizar un notable traballo divulgativo no espazo da CRTVG titulado Dígocho Eu e unha grande orixinalidade no uso do Tik-Tok; Agos Reigosa, un dos veteranos das redes galegas e agora detrás de Twitch en Galego, plataforma que busca a agrupación e asociación dos creadores de contido do país neste servizo; María Sabarís, xornalista na diáspora que acaba de estrear Fóra de mapa, un podcast que busca dar a coñecer as minorías menos visíbeis que existen en Europa; e Jon Amil, unha das facianas máis coñecidas do Galituiter e xestor da conta Emgalego, un dos últimos fenómenos para a expansión e divulgación do reintegracionismo e a resolución de dúbidas sobre a lingua galega.
Modera a mesa Carlos Pereiro, xornalista e director da revista Morcego, amais de membro da Sección de Lingua, Literatura e Comunicación do Consello de Cultura Galega.