Battleborn pechará os seus servidores en xaneiro de 2021

martes, 26 de novembro do 2019 Marcus Fernández

En 2016 os creadores de Borderlands estrearon Battleborn, un shooter de heroes en primeira persoa que tivo a pouca fortuna de coincidir no tempo con Overwatch, véndose eclipsado a grande velocidade, de xeito que a un ano do seu lanzamento tivo que mudar o seu modelo de negocio para converterse en free-to-play, o que non foi dabondo para manter a rendibilidade deste xogo en liña, que xa ten data de caducidade.
Dende 2K Games anuncian que veñen de retirar o xogo das tendas dixitais, e que agora inician un proceso progresivo de apagamento do proxecto, ao que irán destinando cada vez menos recursos. O 24 de febreiro será cando deixarán de vender as moedas virtuais do xogo, que manterá os servidores operativos até xaneiro de 2021, cando Battleborn apagará os seus servidores para sempre, o que impedirá tanto o xogo no modo campaña como o seu multixogador.

PUBLICIDADE