Case, un curioso moedeiro de Bitcoin centrado na seguridade

mércores, 6 de maio do 2015 Marcus Fernández

O feito de que as criptomoedas non sexan tanxibles pode resultar incómodo para algúns usuarios, e atendendo a tal situación desenvolveron Case, un dispositivo co tamaño dunha tarxeta bancaria cunha pantalla cativa, un teclado numérico, un lector de pegadas dixitais, lector de códigos QR e unha tarxeta SIM global (permitindo conectividade de balde en máis de 100 países) deseñada para a xestión e uso de Bitcoin.
A idea deste trebello é que sirva como un moedeiro físico de Bitcoin, que poida levarse enriba e utilizarse dun xeito doado e seguro, de xeito que permitiría o envío e recepción de transaccións de Bitcoin a calquera lugar do mundo, sen ter que depender dun servizo de terceiros que poida ser vulnerable, e que resultaría especialmente indicado para a realización de intercambios de Bitcoin cara a cara.
Este produto pode xa reservarse por 199 dólares (186,39 euros cos gastos de envío incluídos), prezo que parece ser o principal atranco para a súa popularización, pero os seus responsables confían no trebello pola súa seguridade, xa que sería a solución deste tipo máis fiable á venda, ao ofrecer distintos factores de identificación: as cadeas de Bitcon codifícanse con 3 chaves (unha integrada no propio dispositivo, outra nos servidores do fabricante que desbloquéase coa pegada dixital, e unha terceira chave para casos de emerxencia, que almacenarase fóra de liña), sendo preciso 2 para completar unha transacción. Contará inicialmente cunha produción de 1.000 unidades que entregaranse aos seus compradores no verán.


Presentación en vídeo do dispositivo

PUBLICIDADE