Catro bandas galegas xuntaron 1.000 espectadores en YouTube coa interpretación do noso himno
luns, 18 de maio do 2020
A
celebración do Día das Letras Galegas pasará á historia como a
edición máis dixital da historia da efeméride. Houbo, case todo en
formato online, lecturas, vídeos, directos, faladoiros e,
tamén, música. A música foi o elemento clave da actividade
colectiva organizada polas bandas de Arca, Chapela, Vilatuxe e O
Landro de Viveiro, que homenaxearon a Ricardo Carvalho Calero cun
programa especial e a
interpretación do Himno Galego por parte das catro agrupacións.
O programa xuntou máis de 1.000 espectadores que sintonizaron no
Youtube ao longo de dúas horas de emisión.
Houbo
música, entrevistas e, como colofón, a versión confinada do Himno
Galego con 175 músicos, as voces de Lucía Pérez, Najla Shami e
Esperanza Mara e a Familia Vázquez interpretando en lingua de
signos.
A
Banda de Música de Arca, a Banda de Música de Chapela, a Banda de
Música de Vilatuxe e a Banda Municipal de Música O Landro de
Viveiro non quixeron deixar pasar a ocasión de homenaxear a figura
de Carvalho Calero nunha data na “que todas acostuman a facer
concertos” pero que, por mor da emerxencia sanitaria, tiveron que
adaptarse aos novos tempos e traballar xuntas para sacar adiante unha
proposta colaborativa entre as catro asociacións.
A
cita, amais do himno, incluíu entrevistas e música. Carlos
Rodríguez, Andrés Álvarez, Simón Couceiro e Antón Alcalde,
compositores do pasodobre e das obras que puideron escoitarse ao
longo da tarde deste domingo, responderon ás preguntas das bandas
sobre as motivacións das propias pezas pero tamén, de como se
enfrontan á creatividade en tempos de coronavirus.
A
figura homenaxeada nesta edición, Carvalho Calero, estivo
representada en pantalla pola escritora e docente Inma López Silva
que fixo un repaso pola vida e obra do homenaxeado e laiouse de que
tras “terlle sido negada esta homenaxe e en diversas ocasións
polas súas polémicas, vivamos esta situación no momento no que
finalmente se lle concede”.
Tamén
interviñeron Víctor Vilariño, director da Banda de Música de
Vilatuxe, e Carlos Timiraos, da Banda Municipal de Música O Landro
de Viveiro.
O
broche de ouro deste programa foi a versión confinada do Himno
Galego no que participaron 175 músicas e músicos das catro bandas
cunhas colaboracións “moi especiais”: as voces das artistas
Lucía Pérez, Najla Shami e Esperanza Mara. Amais, a recoñecida e
polifacética Familia Vázquez interpretou as verbas de Eduardo
Pondal en lingua de signos.
Vídeo do himno galego