Chema de la Torre, novo director de Tecnoloxía de Coremain
xoves, 7 de agosto do 2014
A galega Coremain
anunciou estes días unha nova e importante incorporación ao seu
equipo directivo. Trátase do nomeamento de Chema de la Torre como
novo director de Tecnoloxía da compañía TIC, até o de agora
máximo responsábel de Discalis, empresa
que recentemente xuntou forzas con Coremain para comezar unha andaina
en común. En palabras de Coremain, “con este nomeamento
péchase deste xeito o proceso de adquisición da liña de negocio do
sector de telecomunicacións de Discalis por parte de Coremain, un
acordo no que se inclúe a incorporación de Chema la Torre ao comité
de dirección e consello de administración da consultora”.
Lembrar que Chema de la
Torre é enxeñeiro informático e desenvolveu a maior parte da súa
carreira profesional no ámbito das TI. Inicialmente estivo ligado
profesionalmente a Comunitel Global até que esta compañía foi
adquirida por Vodafone, no ano 2009, momento no que decidiu adicarse
por completo aos seus propios proxectos empresariais. “A súa
traxectoria profesional está marcada polo seu carácter
emprendedor”, informa Coremain, que engade en que en 2005, con 25
anos, fundou a súa primeira empresa no sector das tecnoloxías de
información. Desde ese ano, creou distintas empresas tanto TIC, como
é o caso de Discalis da que é único socio e director xeral, como
doutros sectores (hostalaría, servizos...) ocupando en todas elas
postos de relevancia, como director xeneral ou conselleiro das
mesmas.
Discalis inicia a súa
actividade no 2006 e especializouse no sector das telecomunicacións;
até a data veu prestando estes servizos a distintas operadoras,
directamente ou a través doutros integradores e afianzouse cun
EBITDA ascendente de 2 díxitos, desde pouco despois da súa
creación. A compañía foi dirixida por Chema de la Torre desde a
súa constitución.
Coremain conclúe que “a
alianza establecida entre ambas as empresas responde á estratexia de
especialización sectorial pola que apostou Coremain desde a
incorporación de Luís Álvarez Sestelo, como máximo responsable da
compañía”. O acordo, sinala, favorece especialmente ao negocio
orientado ao sector das telecomunicacións, no que Discalis achega
máis de 10 anos de experiencia en xestionar proxectos nacionais e
internacionais.
Cifras
As cifras de peche do
primeiro semestre de 2014 son un agoiro positivo para Coremain.
Segundo detallan fontes da empresa con sede no Polígono de Costa
Vella de Santiago, os números non fan máis que “confirmar que o
camiño cara a especialización sectorial iniciado pola compañía
resultou ser o correcto”. A consultora pechou xuño cuns ingresos
acumulados de case 8 millóns de euros e un medre continuo na cifra
de EBITDA que pasa do 8% co que pechou 2013, a un 11% no que vai de
2014.