Como ser mellores profesionais TIC, ao detalle o día 12 nunha xornada do CPEIG
mércores, 4 de decembro do 2019
O
vindeiro 12 de decembro o
Colexio Profesional de Enxeñaría en Informática de Galicia (CPEIG)
vai organizar unha conferencia “inspiradora e motivacional”
titulada Todo se puede entrenar e centrada nas vantaxes
multireccionais (para nós, para a nosa empresa, para o noso equipo
de traballo) do adestramento profesional en clave colaborativa e
buscando un uso racional e positivo das novas tecnoloxías. Trátase
dunha sesión de coaching impartida polo coñecido adestrador
de tenis Toni Nadal. Será no salón de actos da Escola Galega de
Administración Pública (EGAP) en Santiago de Compostela, ás 20
horas, organizada polo Colexio e patrocinada por diversas empresas do
sector TIC.
Segundo
informa o CPEIG acerca dos obxectivos da xornada, esta xirará
arredor da utilidade de reflexionar e establecermos novas metas e
propósitos profesionais, “respectando o uso ético das novas
tecnoloxías, sempre a favor das persoas, a igualdade e a mellora da
calidade de vida”. Na súa intervención, o que fora adestrador do
gran Rafa Nadal fará un repaso a todos os principios que inspiran o
seu método de éxito, comezando pola defensa da formación do
carácter fronte á formación técnica, como piar indispensábel do
triunfo: “Todo o que facilita as cousas en exceso, debilita, e isto
é o que acontece hoxe coas tecnoloxías, que substituíron a parte
esencial do ser humano, que é a súa mente”.