Confirman a sanción de 5.000 millóns de dólares a Facebook

Medidas que adoptará Facebook no marco do acordo pechado coa FTC

Hai un par de semanas The Wall Street Journal adiantou que Facebook podería ter que facer fronte a unha importante sanción da Comisión Federal de Comercio (FTC) dos EE.UU., o que finalmente confirmou a compañía de Mark Zuckerberg, á vez que detalla outras condición do acordo acadado, que non se limita a unha sanción de 5.000 millóns de dólares, senón que tamén obriga á adopción de certas medidas para protexer a privacidade dos usuarios.
Baixo o acordo acadado Facebook comprométese a coidar a privacidade en cada un dos seus produtos, de xeito que contará con proteccións a cada paso e medidas de vixilancia e control. Terán que realizar informes detallados cada trimestre para verificar que cumpren co acordado (facendo que a responsabilidade non se perda baixo o escudo corporativo e o propio Zuckerberg teña que asinar os informes); e precisarán dun organismo independente para vixiar a privacidade dun xeito semellante a como se controlan as finanzas das empresa.
Con este anuncio dende Facebook confían en pechar o capítulo aberto polo escándalo de Cambridge Analytica, para poder avanzar nunha etapa na que poidan contar coa confianza dos usuarios.