Coremain desenvolve un sistema de xestión para a Xunta Arbitral de Transportes

Coremain, referente TIC galego con sede principal en Santiago, mostrounos este mes de agosto os detalles dun novo proxecto de seu para a Axencia para a Modernización Tecnolóxica de Galicia (AMTEGA), unha iniciativa destinada a facer avanzar a Administración autonómica en materia de excelencia dixital. O novo proxecto, máis en detalle, consiste no desenvolvemento dun sistema de xestión para a Xunta Arbitral de Transportes de Galicia, órgano extraxudicial de resolución de conflitos xurdidos durante a execución de contratos de transporte.
A solución deseñada por Coremain permitirá a tramitación electrónica integral dos expedientes xerados. Os desenvolvementos principais estarán orientados a permitir a xestión de solicitudes de reclamacións presentadas e de depósito de mercadorías, a posibilitar a tramitación cen por cen electrónica dos expedientes orixinados polas peticións de reclamación e de depósito e habilitar a consulta (por parte dos solicitantes) do estado de tramitación, así como a notificación electrónica dos avances na tramitación e datos de vistas.
Tamén permitirá o emprego da sinatura electrónica para documentación necesaria para o proceso dos expedientes, a xestión de convocatorias de reunións da Xunta Arbitral e vistas ou a xestión do acceso a vistas por videoconferencia, entre outras funcionalidades.