Corunet, Optare e Torus Software, entre as empresas excelentes con Indicador Ardán

xoves, 2 de febreiro do 2023 S. P.

A Zona Franca de Vigo recoñeceu este xoves 2 de febreiro a traxectoria de tres empresas galegas das novas tecnoloxías: Corunet (firma de software avanzado para sectores como o retail e a banca, entre outros moitos), Optare Solutions (consultora provedora de operadoras de telecomunicacións) e Torus Software Solutions (enxeñaría informática centrada no Big Data e DevOps). Estas tres firmas forman parte da listaxe de doce empresas excelentes distinguidas nos Premios Ardán concedidos pola Zona Franca de Vigo. Os galardóns foron entregados no Auditorio Mar de Vigo ao que asistiron preto de catrocentos convidados, representantes do mundo empresarial, económico, social e político de Galicia.
Doce empresas excelentes
Doce foron as empresas que recolleron o galardón ao obter o maior número de indicadores, unha delas alcanzou por primeira vez 7 indicadores. Tamén se entregou un recoñecemento ao alcalde de Vigo, Abel Caballero, pola súa contribución á economía da cidade con políticas que “permitiron que Vigo sexa unha referencia en diferentes ámbitos e manteña un vigoroso crecemento”. O delegado do Estado, David Regades, deu a benvida e a conferencia central estivo a cargo de Isabel Aguilera, directiva de multinacionais como Google, GE ou Dell Computer, co título Luces do futuro.
O delegado do Estado asegurou que “as empresas con Indicadores Ardán son compañías que destacan por ser capaces de xerar vantaxes competitivas que as fan únicas”. E engadiu: “Teñen un importante impacto na competitividade global da nosa contorna e son capaces de crear riqueza e emprego”.
Das 35.651 empresas analizadas, soamente o 3,93% conseguiu 1 ou máis indicadores Ardán, en total son 1.401 compañías. Neste sentido, David Regades subliñou algúns datos destas compañías, como que representan o 4% do tecido empresarial de Galicia e crean o 25% da riqueza, dese 25% o 3% corresponde ás 12 empresas premiadas hoxe.
Ademais, as empresas con indicadores Ardán son as responsábeis de 1 de cada 4 empregos creados polo armazón produtivo galego, mostran unha produtividade do emprego que duplica á media galega e a rendibilidade económica media das empresas cos ditos indicadores é 12 puntos porcentuais superior á media das compañías galegas.
Estas son as doce empresas que recibiron a figura dos Premios Ardán deseñada por José Molares:
1.- Compañia Española de Algas Mariñas (CEAMSA).: 7 indicadores. Xeradora de riqueza, alta produtividade, ben xestionada, empresa global, empresa igual en xénero, empresa circular e xestión de talento.
2.- HERMASA Canning Technology: 6 indicadores. Xeradora de riqueza, empresa global, empresa innovadora, empresa igual en xénero, empresa circular e xestión de talento.
3.- Corunet. 6 indicadores. Gacela, alto rendemento, ben xestionada, empresa global, empresa innovadora e xestión de talento.
4.- ACTEGA Artistica. 5 indicadores. Xeradora de riqueza, alta produtividade, ben xestionada, empresa global e empresa circular.
5.- VEGONSA Agrupacion Alimentaria. 5 indicadores. Gacela, alto rendemento, xeradora de riqueza, alta produtividade e ben xestionada.
6.- Instituto de Estudos Celulares e Moleculares. 4 indicadores. Gacela, alto rendemento, xeradora de riqueza e alta produtividade.
7.- Peteiro Motor. 4 indicadores. Alto rendemento, xeradora de riqueza, alta produtividade e ben xestionada.
8.- Rolux Serigrafia e Rotulacion. 4 indicadores. Gacela, alto rendemento, alta produtividade e ben xestionada.
9.- Comunidade Campus. 4 indicadores. Gacela, alto rendemento, xeradora de riqueza e alta produtividade.
10.- Optare Solutions. 4 indicadores. Empresa global, empresa innovadora, empresa circular e xestión de talento.

PUBLICIDADE