Elocity A7, un tablet con Android 2.2 e nVIDIA Tegra 2 a un prezo moderado

xoves, 9 de setembro do 2010 Marcus Fernández

Tras a avalancha de tablets con Android no IFA de Berlín, na que sorprendía o elevado prezo dos mesmos (que chegaban a custar máis que o iPad de Apple nos modelos máis avanzados), en Amazon sorprenderon listando o Elocity A7, un tablet con pantalla táctil de 7 polgadas, sistema operativo Android 2.2, procesador nVIDIA Tegra 2 T-20 a 1 GHz (de xeito que é capaz de reproducir vídeo en alta definición), 512 Mb de RAM, 4 Gb de almacenamento interno, cámara de 1,3 Mpíxeles, saída HDMI, conectividade Wi-Fi N, Bluetooth e USB 2.0, un peso de 463 gramos e un prezo de só 369,99 dólares (290,81 euros).
Temos así un excelente reprodutor multimedia, con suficiente potencia para acceder á Internet de xeito satisfactorio (podendo reproducir contidos a través do Adobe Flash Player 10.1 e vídeos en Full HD), que goza das bondades da última versión de Android á vez que conta cun prezo razoable, no que sería de agardar que avanzasen outros produtos semellantes se non queren que Apple monopolice esta gama de dispositivos.

O Elocity A7 pode ser un excelente reprodutor multimedia, capaz de amosar contidos en alta definición e cunha saída HDMI para poder amosalos nun televisor

PUBLICIDADE