EyeFi renóvase para achegar aos fotógrafos accesibilidade total ás súas imaxes
xoves, 8 de xaneiro do 2015
EyeFi,
suite de aplicacións de fotografía e servizos na nube, vén
de incorporar importantes funcionalidades ao seu seo destinadas a
facer máis cómoda e accesíbel a plataforma, características
entre as que se contan a posibilidade de elixirmos a nosa cámara
favorita ou un recurso que nos axuda a elixir o intre máis axeitado
para facermos unha foto. Tamén se traballou en achegar un acceso
doado e rápido a cada imaxe, “en calquera momento e en calquera
lugar”.
Lembrar que EyeFi é unha
compañía especializada en ofrecer solucións para facer fotos con
DSLR, Wi-Fi e cámaras de dispositivos intelixentes. Entre as súas
novas capacidades inclúese a de permitirnos organizar e sincronizar
as nosas imaxes a través do smartphone ou tableta co
escritorio dun PC, automaticamente e tan axiña como se toma a
fotografía.
Por outra banda, o
sistema pon en xogo o factor nube (EyeFi
Cloud), o que libera aos computadores persoais e os seus
discos duros de ter que amorear e cargar cantidades inxentes (e
crecentes) de ficheiros (a almacenaxe no PC, práctica aínda moi
estendida, dificulta o acceso aos ficheiros a través dunha tableta
ou outro dispositivo). De feito, EyeFi Cloud fornece unha
funcionalidade para cargar fotos que posibilita a transferencia de
imaxes existentes desde un PC a EyeFi Cloud e de forma ilimitada. “Co
cargador de fotos”, informan os responsábeis da plataforma, “as
imaxes envíanse facilmente a EyeFi Cloud e sincronízanse de contado
con todos os dispositivos, o que fai que a colección de fotos sexa
accesíbel dende calquera recanto a través de tabletas, teléfonos
ou todo tipo de dispositivo con conexión a Internet”.
Entre as características
adicionais do novo EyeFi inclúense: previsualización de todas as
fotos, realización de axustes, ver que axustes da cámara se
empregaron para crear a imaxe perfecta ou buscar fotos por tipo de
cámara para atopar rapidamente as mellores.