Football Manager 2019 sae á venda con imaxe renovada

venres, 2 de novembro do 2018 Marcus Fernández

Os xogadores que no seu día estaban enganchados ao clásico PC Fútbol no seu ordenador atoparon na franquía Football Manager un grande relevo, que ofrece unha experiencia moito máis completa e ambiciosa, de aí que conseguise consolidarse como referente do seu xénero, e con Football Manager 2019 non só manteñen o pulo, senón que este xogo lánzase hoxe nas súas versións para PC e Mac acompañado por Football Manager 2019 Touch e Football Manager 2019 Mobile, sendo a primeira vez que as tres versións chegan ao mercado simultaneamente.
Esta nova entrega do Football Manager promete ser o meirande lanzamento da historia da serie, con grandes melloras nos aspectos tácticos e de adestramento, xunto á renovación da imaxe de marca e a estrea da licenza da Bundesliga.
A crítica considera que o Football Manager 2019 é a mellor entrega da saga, que permite tomar as rendas dun club de éxito ou partir do equipo modesto e facelo evolucionar, conta con máis de 2.500 clubs, permite decidir as dinámicas de equipo, conta cun catálogo de máis de 500.000 xogadores, non esquece un módulo de adestramento e incluso inclúe a tecnoloxía da liña de gol e o VAR.

A Bundesliga estréase este ano no Football Manager

Tráiler de lanzamento do Football Manager 2019

PUBLICIDADE