Galicia ficou á marxe do incremento dos pagos dixitais no sector hostaleiro
xoves, 28 de outubro do 2021
A
compañía de solucións de pago UniversalPay publicou un estudo
sobre a transformación experimentada polo sector hostaleiro ao
abeiro do espallamento das novas tecnoloxías e, tamén, da crise
pandémica que acelerou a marea dixitalizadora. Segundo se fai saber
no informe, o sector (a nivel estatal) ingresou un 13,6% máis a
través do cobro con tarxetas e dispositivos contactless
durante os meses de verán en relación ao mesmo período do ano
anterior. Amais, en agosto foi quen de facturar a través do pago con
cartón un 11% máis que no mes de xullo e un 25% máis que no mes de
setembro.
O
estudo releva “un cambio progresivo no comportamento dos clientes á
hora de efectuar as transaccións, e a consolidación da tendencia a
limitar o uso de efectivo acelerada pola pandemia”. Respecto a
Galicia, no canto dunha taxa que reflicta un crecemento no uso destas
ferramentas, rexistrouse unha diminución.
Este
medre desigual por comunidades, segundo fai saber UniversalPay,
débese aos propios fluxos do turismo e ás restricións sanitarias
propias de cada territorio: “Por unha banda, o número de turistas
recibidos, a procedencia dos mesmos e, pola outra, as restricións
máis ou menos relaxadas impostas polas autonomías ao sector,
contribuíron a acelerar ou retardar a introdución das transaccións
con cartón entre os clientes durante as súas vacacións nun verán
aínda atípico”.
Así,
o estudo constatou “un meirande aumento da facturación con cartón
no centro norte do país”, onde destaca un incremento na recadación
con este método de pago en Asturias, comunidade na que se
multiplicou por máis de tres, ou en Cantabria, onde case se duplicou
a cantidade facturada con cartón en relación ao ano pasado.
Pola
contra, Galicia e País Vasco, cun descenso cada unha do 78% e do
55%, son dúas das comunidades onde a recadación do sector
hostaleiro pola vía do pago con cartón máis diminuíu este verán
en relación ao período estival do ano anterior.