Galiciadixital chega este martes ao Hospital Xeral Calde de Lugo
venres, 8 de xaneiro do 2010
Prosegue o itinerario da exposición Galiciadixital por centros sanitarios, locais sociais e fogares da terceira idade da nosa xeografía, itinerario que, precisamente, constitúe unha das grandes novidades do programa 2009/2010 da devandita mostra tecnolóxica. Pois ben, segundo informa a Secretaría Xeral de Medios (departamento responsable desta iniciativa en colaboración coa Consellería de Sanidade), o vindeiro martes 12 de xaneiro abrirase a exposición no Complexo Hospitalario Xeral-Calde de Lugo. A cita dará comezo ás 11.00 horas e contará coa presenza (entre outras autoridades e representantes de colectivos locais) de Alfonso Cabaleiro, titular do devandito departamento da Xunta.
Como dixemos, a chegada ao hospital lucense da mostra dixital forma parte da nova realidade da mesma, segundo sinalan fontes da Secretaría Xeral con meirande intención de chegar a tódolos colectivos galegos. Asemade, nesta etapa da proposta quérese facer fincapé nos seus aspectos máis interactivos, fomentando a participación dos espectadores ao longo e ancho do percorrido pola iniciativa. Este feito, sinalan os responsables da mesma, fai que sexa de grande interese didáctico para as persoas de tódalas idades, “e así o demostra o gran éxito que está a acadar nas localidades que visita”. Galliciadixital estará no dito emprazamento de Lugo até o día 17.
