LEGO Universe poderá xogarse de balde

Os xogos de LEGO tenden a ser bastante tradicionais, pero no outono de 2010 decidiron levar a experiencia máis aló con LEGO Universe, un xogo masivo multiusuario en liña para PC e Mac que permite introducirse nun mundo habitado por figuras de LEGO no que vivir moitas aventuras, pero que non parece estar a captar a atención esperada, de aí que agora anuncien que a partir de agosto o xogo contará cunha opción free-to-play, ou sexa, que xa non será preciso mercar o xogo en DVD (actualmente a 9,99 euros) nin pagar cotas mensuais para poder introducirse neste título que busca así ampliar a súa base de xogadores, aínda que continuará a contar con usuarios de pagamento (que terán acceso a un xogo completo).
Os usuarios que accedan de balde a LEGO Universe poderán moverse por 2 zonas de aventuras e contarán cunha área na que construír modelos de LEGO virtuais, o que pretende ser un avance da experiencia completa, para atraer a futuros subscritores de pagamento.