LG anuncia un novo trebello para facer intelixentes os televisores

Para os usuarios que conten cun televisor de alta definición sen as prestacións avanzadas dun dos novos equipos e que queiran gozar de servizos en liña sen renovar o seu televisor achega LG un novo trebello, o SP820 Smart TV Upgrader, que sae á venda en Corea do Sur en xuño por 199.000 wons (135,58 euros) e que, entre outros detalles, inclúe un mando que permite o control por movemento e por voz.
O novo trebello tamén facilita o acceso a contidos en 2D e 3D da Internet, soporta DLNA, é compatible con Wi-Fi Direct e, como era de agardar, permite a instalación dos centos de aplicacións das que LG dispón nos seus últimos televisores, e que pasarán a estar accesibles para todos os equipos aos que se lle engada este dispositivo a través un porto HDMI.
Supomos que nos vindeiros meses o actualizador a Smart TV estará dispoñible en case todo o mundo.