MediaTek presenta un novo modem 5G con soporte para banda milimétrica

martes, 2 de febreiro do 2021 Marcus Fernández

Os procesadores para móbiles de MediaTek están a xogar un papel moi importante á hora de popularizar a 5G en smartphones económicos, pero tamén queren apuntar alto, de aí que anuncien un novo elemento que contribuirá a tirar o máximo proveito da banda larga móbil: o novo modem M80 5G.
Este novo modem non só pode conectarse a redes 5G en bandas por debaixo dos 6 GHz, senón que tamén é compatible con mmWave, de xeito que un único chip facilita o acceso a arquitecturas NSA e SA a velocidades de descarga de até 7,67 Gbps e de subida de 3,76 Gbps. O modem M80 5G tamén soporta dobre SIM e dobre VoNR (Voice over New Radio).
Até o momento, os móbiles 5G con procesadores de MediaTek empregan o modem M70, e ao longo de 2021 irán incorporando o novo modem, que fará que os smartphones con tecnoloxía de MediaTek poidan competir dignamente con dispositivos baseados en tecnoloxía de fabricantes como Qualcomm.

PUBLICIDADE