Microsoft presenta un teclado e un rato para xogadores

mércores, 20 de agosto do 2008 Marcus Fernández

A Games Convention de Leipzig foi o escenario elixido por Microsoft para anunciar os seus novos periféricos para xogadores, coma son o teclado Sidewinder X6 e o rato Sidewinder X5, que pretenden facilitar o uso dos periféricos durante o xogo.
O rato Sidewinder X5 é unha evolución do rato Sidewinder orixinal, que permite cambiar os pesos internos, axustar a súa resolución (ata 2.000 dpi) e configurar os seus 5 botóns programables (tamén conta cun botón de inicio rápido para o Explorador de Xogos de Windows Vista). O seu prezo de venda será de 59,95 dólares (nos EE.UU.).

Pero resulta moito máis rechamante o teclado Sidewinder X6, que permite intercambiar o seu teclado numérico dun lateral a outro, retroiluminación de 2 cores diferentes (vermello para as teclas non programables e ámbar para as teclas personalizables e especiais). Tampouco lle faltan as teclas multimedia e un par de pads para controlar o volume e a luminosidade do teclado. O seu prezo de venda será de 79,95 dólares (nos EE.UU.).
O lanzamento destes 2 periféricos sería para o mes de setembro.

PUBLICIDADE