MultiVersus será un xogo de loita en plataformas con personaxes da Warner

xoves, 18 de novembro do 2021 Marcus Fernández

Warner Bros Games anunciou un novo xogo de loita en plataformas (na liña dos Smash Bros. de Nintendo) que chegará en 2022 a PS4, PS5, Xbox One, Xbox Series X|S e PC con xogo cruzado. MultiVersus tirará proveito de numerosas franquías da Warner, de xeito que poderemos ver en acción a personaxes como Batman, Superman, Wonder Woman, Harley Quinn (do Universo DC), Shaggy (de Scooby-Doo), Bugs Bunny, Tom e Jerry, Arya Stark (Game of Thrones), Jake e Finn (Hora de Aventuras), Steven Universe e Garnet (de Steven Universe) e a un novo personaxe orixinal, Reindog.
Contar con grandes personaxes será un importante reclamo para este xogo no que poderán amosar as súas habilidades especiais a través de escenarios recoñecibles das súas propias franquías (como a Batcova). MultiVersus tamén terá distintos modos de xogo (1 contra 1, 2 contra 2 ou todos contra todos para 4 xogadores), resultando especialmente rechamante que a Warner decidise lanzar este título como Free-to-Play, o que pode darnos a entender que incorporará moitos personaxes e contidos paulatinamente para conseguir fidelizar aos xogadores a longo prazo e así poder facer negocio con micropagamentos, afastándose do modelo de negocio do brawler de Nintendo.

Vídeo no que presentan MultiVersus

PUBLICIDADE