Nace unha revista española exclusiva para tablets
xoves, 23 de decembro do 2010
Moitas son xa as revistas que contan cunha versión
electrónica adaptada ao iPad, pero agora estréase en España a publicación iMAG, que destaca por ser nativa neste formato,
ou sexa, que estariamos ante a primeira revista dixital española para iPad, que
chega cun número 0 de balde que serve coma incentivo para instalar a aplicación
dende a que descargar os distintos números da publicación, que no futuro
custarán 2,39 euros cada un.
iMAG ofrece un formato moi semellante ao que xa vimos na revista norteamericana
Wired, coa que tamén coincide bastante en contidos (estilo de vida, deseño,
ciencia, tendencias e tecnoloxía). A revista pode consultarse en vertical e
horizontal (con maquetacións adaptadas á orientación de lectura), contan con
vídeos, audio, galerías fotográficas, imaxes en 360 graos, textos activos, ligazóns
a Twitter, a web ou o correo electrónico e un sistema de navegación
intelixente, ou sexa, as prestacións propias da ferramenta Adobe Digital
Publishing, da que saben tirar proveito e que podería marcar o futuro deste
tipo de publicacións no futuro.
A primeira entrega desta revista electrónica conta con colaboradores coma os
blogueiros Enrique Dans, Javier Penalva, Juan Castromil, Justo Romano, Mauro
Fuentes, Nacho Palou, Dani Burón, Alexandra Guerrero, Manu Contreras, David
Bayón, Juan Francisco Diez e Ángel Jiménez, que serven de exemplo da liña que
seguirá esta publicación, aínda que o seu número 0 sexa excesivamente breve
como para facerse unha boa idea do produto final.
Aínda que polo momento iMAG sexa unha revista exclusiva para iPad, a súa
intención é adaptarse no futuro a tablets con Android, Windows e BlackBerry, de
xeito que permanecerá en dispositivos
electrónicos portátiles, fuxindo dos soportes impresos e de formatos
estáticos coma o PDF.
Este proxecto está dirixido por Carolina
Denia, coñecida polo seu traballo en Clipset.
Así é o funcionamento de iMAG