Novo tablet chinés con controis físicos para unha mellor experiencia de xogo

Os afeccionados aos videoxogos que gusten tanto dos títulos para dispositivos móbiles co sistema operativo Android ou de xogos clásicos a través da emulación teñen como unha moi boa opción certos tablets chineses que integran controis físicos como o JXD S7300, do que falamos a primeiros de ano, e do que agora sabemos dun modelo máis moderno, o JXD S7800B, que sairá a finais de agosto ou primeiro de setembro a un prezo de 169,99 dólares (uns 128 euros con portes incluídos) que supón unha mellor moi significativa, por funcionar cunha pantalla IPS de 7 polgadas cunha resolución de 1.280 x 800 píxeles, procesador RockChip 3188 de catro núcleos a 1,8 Gb (con gráfica Mali 400), 2 Gb de RAM, 8 Gb de almacenamento interno (ampliable mediante tarxetas de memoria de ata 32 Gb) e sistema operativo Android 4.2.2.
Este atractivo tablet orientado ao xogo inclúe 9 emuladores que facilitan o uso de xogos da primeira PlayStation, de Ninntendo 64, recreativas de Capcom e Neo-Geo, Game Boy Advance, Nintendo, Super Nintendo e Megadrive, pode aproveitar os seus mandos físicos con xogos que soporten tal función ou a través dunha ferramenta que mapea os controis táctiles cos mandos físicos e tamén permite a reprodución multimedia de vídeos ata 1.080p (contando con saída HDMI para poder velos no televisor). Este atractivo trebello conta con cámara traseira de 0,3 Mpíxeles, Wi-Fi N, USB 2.0 e batería de 5.000 mAh, e os usuarios que queiran gozar dun modelo máis portátil, tamén chegará con pantalla de 5 polgadas como JXD S5800.