O 29 de setembro arrinca en Vigo a cuarta edición das Xornadas Videoxogo e Literatura
xoves, 22 de setembro do 2022
A
sede da Fundación Barrié de la Maza en Vigo vai acoller a vindeira
semana a cuarta edición das Xornadas Videoxogo e Literatura, que se
desenvolven entre o 29 de setembro e o 1 de outubro baixo o epígrafe
Unha mirada transversal. Organizadas pola Fundación Carlos
Casares en formato presencial (con posibilidade de ver as sesións en
streaming), están patrocinadas polo Concello de Vigo, a Deputación
de Pontevedra e máis a Consellería de Cultura da Xunta. As xornadas
arrincan ás 16.00 horas do xoves 29. Pódese facer unha reserva de
balde en videoxogoeliteratura.gal.
O obxectivo é “abordar o sector cunha perspectiva transversal, sen
perder de vista a súa relación coa literatura e as súas técnicas”.
Estes
encontros veñen explorando dende 2019 as relacións que ambas as
dúas áreas (videoxogos e literatura) establecen dentro sector
cultural e creativo: “Son lazos sólidos con frecuencia, outras
veces superficiais, pero sempre dinámicos ao ter que moverse nunha
contorna económica inestábel”, explican dende a organización,
engadindo que tamén se busca “ampliar o coñecemento público do
sector; debullar as perspectivas de crecemento; apuntar retos e
desafíos dos seus profesionais”.
Nesta
edición haberá novos contidos para as mesas redondas e os
faladoiros; novas clases maxistrais, e, por primeira vez, coa estrea
do filme documental La industria salvaje de Horacio Rodríguez
Maseda, unha radiografía do sector en Galicia e en España. A
organización tamén destaca a consolidación da Desconferencia,
un espazo reservado a calquera persoa interesada en vir falar ata un
máximo de 15 minutos da súa experiencia, do seu proxecto creativo
no sector do videoxogo, das súas inquedanzas na literatura
transmedia.