O COETTGA denuncia que a crise sanitaria agrava a fenda dixital galega
venres, 20 de marzo do 2020
- José M. Martínez, decano do COETTGA
O
Colexio
Oficial de Enxeñeiros Técnicos de Telecomunicacións (COETTGA)
vén de emitir un comunicado no que pon de manifesto a súa
preocupación polas eivas de cobertura que está a poñer de
manifesto a crise sanitaria do COVID-19 e a necesidade das familias e
das empresas de amplas contornas da nosa xeografía de seguir
mantendo a súa actividade botando man das redes e máis das novas
ferramentas. A entidade fai saber que o illamento durante o estado de
alarma evidenciou a “enorme fenda tecnolóxica” que existe en
Galicia e en España, cunha ampla taxa de poboación (uns 3,2 millóns
de persoas) sen posibilidade de ter acceso a Internet de calidade e
ás canles educativas telemáticas.
O
decano do COETTGA, José M. Martínez, sinala que “este aumento na
demanda de medios telemáticos e de telecomunicacións constatou a
significativa brecha tecnolóxica galega, que penaliza as zonas do
rural, e que veciños e institucións levan denunciando durante os
últimos tempos”. O decano, malia recoñecer no seu comunicado os
“importantes avances en moitas zonas”, sinala que “aínda
quedan moitos puntos escuros no rural galego” que fan imposíbel,
en situacións como as que estamos a vivir, unha continuidade plena
da actividade empresarial, formativa e comunicativa.
O
colexio lembra que segundo datos do Ministerio de Economía, máis de
3,2 millóns de habitantes teñen unha conexión a Internet
deficiente cunha velocidade menor a 10 Mbps. “A situación”,
explica, é aínda máis grave para preto de 1 millón de persoas
cunha capacidade de banda que non chega aos 2 Mbps”. Resultado:
familias, vilas enteiras que non teñen acceso a Internet e que estes
días de crise sanitaria e illamento social “non poden estar
conectadas aos seus seres queridos e sobrelevar a incerteza desta
situación descoñecida para a sociedade”.
O
colexio tamén recorda que é impensábel para estas familias do
rural “seguir as clases virtuais das
escolas
ou universidades”.
Para
a entidade profesional galega, cumpriría pór en marcha unha tarifa
social e pechar as brechas tecnolóxicas que existen na poboación.
O
caso de San Xoán do Río
“A
principal brecha rural que hai agora é a lexislación. Porque vai
moi por detrás da tecnoloxía. Hai 50 anos, a electricidade chegou á
última casa custase o que custase, porque así se lexislou; pero
agora, iso non se está facendo”, afirma Xosé M. Blécua, alcalde
de San Xoán de Río e vocal do COETTGA. Ao que engade: “Agora
mesmo, por lei, o único que se obriga é a ter telefonía fixa por
cable e velocidade de 1MB por segundo. Todos sabemos que a fixa esta
desaparecendo. E unha conexión decente son de 30MB”. Blécua
conclúe dicindo que “sempre quedan sen avances os habitantes do
rural. O 5G no rural non o imos ver mentres non se lexisle, porque
non sae rendible. No noso concello temos 59 núcleos de poboación,
dos que só 1 supera os 30 Mbps”.
Segundo
Dividendo Dixital
O
colexio tamén puxo o foco nos problemas de desenvolvemento de
servizos e infraestruturas que vai implicar a suspensión do Segundo
Dividendo Dixital, que se interrompeu a pasada fin de semana polo
Ministerio de Asuntos Económicos e Transformación Dixital “até
que se dean as condicións axeitadas”. O COETTGA recorda que as
provincias de Ourense e Pontevedra estaban mergulladas os días
pasados no proceso de liberalización da banda de 700MHz, coñecido
como Segundo Dividendo Dixital, para que puidese ser empregada polas
tecnoloxías de banda larga móbil. “Esta suspensión adiará a
posta en marcha da tecnoloxía 5G nestas zonas, afectando a case un
millón e medio de persoas, que precisamente viven nalgunhas das
comarcas máis desfavorecidas”, explica Martínez.