O CiTIUS acolle unha charla sobre o incerto futuro de Europa no ámbito da Intelixencia Artificial
xoves, 3 de decembro do 2020
O
centro
compostelán CiTIUS acolle este venres unha charla sobre o futuro da
Intelixencia Artificial e as súas implicacións sociais, co foco
posto na paradigma europeo. Contarase coa presenza de Andrés Pedreño
e Luis Moreno, autores do libro Europa fronte a EEUU e China.
Previr o declive na era da Intelixencia Artificial, no
que expoñen como varias décadas nefastas de políticas
económicas e de sobre-regulamento dixital leváronnos á actual
fenda tecnolóxica que, de non corrixirse, “terminará por
sentenciar o benestar e o emprego de millóns de europeos e
europeas”. De feito, explican, Europa móstrase cada vez máis como
unha potencia económica de segunda orde, dependente no tecnolóxico
de China e Estados Unidos. A
charla poderá seguirse en liña.
Na
súa crítica, Pedreño e Moreno propoñen un cambio de discurso
achegando posíbeis solucións en materia de educación, xestión dos
recursos públicos, ou desenvolvemento emprendedor. Medidas todas
elas que deben ser escoitadas e aplicadas con urxencia para que
Europa poida impulsar o seu benestar na cuarta Revolución
Industrial, engaden.
Sobre
os relatores
Andrés
Pedreño é catedrático de Economía Aplicada e doutor honoris causa
pola Nottingham Trent University (Reino Unido). Reitor da
Universidade de Alacante durante o período que vai de 1993 a 2000, é
o fundador e conselleiro delegado de Universia (2000-2004),
plataforma con máis dun milleiro de universidades de 20 países.
Autor de medio centenar de libros relacionados coa economía
española, a educación e o mercado de traballo e a economía
dixital. Nos últimos 20 anos desenvolveu proxectos de tecnoloxía e
varias startups de éxito nacional e internacional. É
fundador da Biblioteca Virtual Miguel de Cervantes (Premio Stanford
University á mellor biblioteca dixital).
Luis
Moreno é profesor do Departamento de Análise Económica Aplicado da
Universidade de Alacante e membro investigador do Instituto de
Economía Internacional. É licenciado en Economía na Universidade
de Alacante en 2007, mestrado en Cooperación Internacional e Xestión
de Proxectos en 2009, e doutor internacional, con premio
extraordinario de doutoramento, en 2013. As súas áreas de
investigación céntranse na economía da innovación e a economía
do turismo, nas que publicou en distintas revistas internacionais de
distintos ámbitos sociais e económicos.