O Concello de Verín e Xoia presentan a app que devolve Caldeliñas á súa época dourada
luns, 12 de agosto do 2019
O
Concello de Verín aposta de cheo polas novas tecnoloxías para dar a
coñecer ante o mundo o seu importante patrimonio. A semana pasada,
sen ir máis lonxe, o
Goberno local presentou no Balneario de Caldeliñas a aplicación
móbil de Realidade Aumentada chamada Time Trip Caldeliñas, que
foi deseñada pola empresa galega Xoia Software e que salienta por
poñer ao alcance da man dos usuarios (en cadanseus móbiles) unha
pormenorizada e exhaustiva reconstrución en 3D do senlleiro edificio
termal. E faino, ademais, recuperando o brillo do seu máximo
esplendor: a principios do século XX.
O
acto de presentación correu a cargo do alcalde de Verín, Gerardo
Seoane, e do tenente de alcalde, Diego Lourenzo Moura, quen,
acompañados de Xoel Vázquez e Cristina García Souto, director
executivo e directora de proxectos de Turismo e Cultura da empresa
Xoia Software, mostraron aos medios de comunicación presentes o
funcionamento da aplicación. Polo que respecta á intervención dos
responsábeis municipais ante os medios, comezaron agradecendo e
felicitando o gran labor despregado por Xoia, do que abrollou unha
tecnoloxía que “democratiza a cultura e o coñecemento, permitindo
a calquera usuario viaxar ao pasado e coñecer de maneira rigorosa, á
vez que divertida, enclaves de especial interese histórico
utilizando tan só o seu terminal móbil”.
Realidade
Aumentada
A
ferramenta dada a coñecer é unha aplicación gratuíta interactiva
baseada na Realidade Aumentada que posibilita, a través do móbil
(smartphone) ou mesmo unha tableta, reconstruír o pasado
sobre o que estamos a ver en tempo real. “Permítenos con simples
xestos trasladarnos a través das distintas estancias e escenas da
vida diaria do histórico Balneario de Caldeliñas a principios do
século XX”, explicaron os responsábeis do seu desenvolvemento,
engadindo que un dos desafíos do traballo despregado foi conseguir
“dar vida ao pasado recuperado”, ofrecendo un produto “con
rigor histórico, que dea un paso máis no entretemento
turístico-cultural”.