O Día da Ciencia na Rúa regresa este sábado ao parque de Santa Margarida da Coruña
venres, 6 de maio do 2022
Este
sábado 7 de maio A
Coruña vai celebrar ao grande o Día da Ciencia na Rúa. Farao
dende o parque de Santa Margarida e convocando a destacada cifra de
35 centros educativos. Será, en palabras da organización (o
Concello a través dos Museos Científicos Coruñeses), “unha
xornada festiva e divulgativa con múltiples actividades para todas
as idades”. Na listaxe de colaboradores atopamos ao Centro
de Investigación TIC (CITIC) da UDC, que mostrará os seus
relevantes achados ao abeiro do proxecto Talentos Inclusivos (entre
outras actividades).
Unha
data singular... e histórica
Este
acontecemento reúne desde hai 25 anos a ducias de centros educativos
e milleiros de persoas no parque de Santa Margarida. O pasado ano
trasladouse de xeito excepcional ao Teatro Colón nunha xornada que
“conservou a esencia da celebración adaptándoa as circunstancias
sanitarias”, explica o Concello, poñendo o foco na significativa
volta ao parque de Santa Margarida, co fin de dar forma “a unha
especial romaría científica na que son protagonistas principais o
alumnado e o profesorado de centros educativos de diversas
localidades galegas”. Nesta edición, participan 35 centros da
Coruña, Betanzos, Culleredo, Ribadeo, Cambre, Carral, Coristanco,
Ortigueira, Pastoriza e Miño. Farano mostrando polo miúdo as
actividades e experiencias que prepararon durante meses para convidar
a cidadanía a descubrir, aprender e xogar coa ciencia.
Múltiples
apoios
No
Día da Ciencia da Rúa estarán tamén presentes entidades e
institucións vinculadas á actividade científica. A Universidade da
Coruña participa coa Facultade de Ciencias, a Escola de Enxeñeiros
de Camiños, a Agrupación Estratéxica do Centro de Investigacións
Avanzadas (CICA), o Centro de Investigación TIC (CITIC) da UDC e a
Cátedra EMALCSA-UDC. Tamén acudirán outras institucións asentadas
na cidade, como o Centro Oceanográfico da Coruña, e o Instituto de
Investigación Biomédica da Coruña-Grupo CellCOM e Grupo de
Microbioloxía. Sumáronse ademais nesta edición a Facultade de
Física USC e a Facultade de Ciencias USAL.
Outras
entidades, como a Asociación Galega de Xadrecistas-AGAX, a
Agrupación Astronómica Coruñesa Ío, Bricolabs, Ludo Sociedade
Deportiva ou Gallaecia Viva ofrecerán as súas actividades para o
público que visite o parque de Santa Margarida este sábado. O
desfile de cabezudos de famosos científicos, un concerto do
Conservatorio de Música da Coruña, xogos e obradoiros, completarán
esta xornada festiva.
Xornada
de portas abertas nos Museos Científicos
Ademais,
os Museos Científicos Coruñeses súmanse a este día con xornada de
portas abertas nos seus tres centros, a Casa das Ciencias, a Domus e
o Aquarium Finisterrae. Na Casa das Ciencias, no centro da festa no
parque, a entrada será libre neste día. Na Domus e no Aquarium será
preciso reservar os billetes para gozar desta xornada de portas
abertas.
Premio
Javier Novelle
Nesta
edición do Día da Ciencia na Rúa quéreselle render unha homenaxe
a Javier Novelle, quen desde a Asociación de Amigos da Casa das
Ciencias e durante 24 anos impulsou con grande éxito esta
celebración, traxectoria interrompida polo seu falecemento.
A
participación do CITIC
O
CITIC participará cunha caseta propia. O centro foi convidado a
formar parte deste evento para mostrar diferentes proxectos de
investigación levados a cabo no seu seo, así como os
desenvolvementos en torno ao proxecto Talentos Inclusivos, que
promove solucións tecnolóxicas para persoas con diversidade
funcional.
A
piques de finalizar a súa segunda edición, Talentos Inclusivos está
posto en marcha polo CITIC e ASPACE Coruña e conta co apoio do
Consello Social da UDC, a Fundación Española para a Ciencia e a
Tecnoloxía (FECYT), a Consellería de Cultura, Educación e
Universidade da Xunta e o Concello da Coruña. No Día da Ciencia na
Rúa, as persoas visitantes poderán coñecer algúns dos produtos de
apoio desenvolvidos na primeira edición do proxecto por parte de
estudantes de Secundaria para mellorar a calidade de vida de persoas
con parálise cerebral.
A
carpa do CITIC, que será a nº 1, estará organizada en dúas zonas:
mostra de proxectos e Talentos Inclusivos.