O Edificio Fontán, no marco do encontro Ciber.gal acollerá o concurso Capture The Flag
xoves, 4 de novembro do 2021
O
Edificio Fontán da Cidade da Cultura acollerá os vindeiros días 10
e 11 de novembro o primeiro Encontro
Galego de Ciberseguridade Ciber.gal dirixido a empresas,
cidadanía e administracións públicas. No marco deste evento, o día
10, celebrarase en modalidade presencial (dende as 15h ata as 19h) o
concurso Capture The Flag, que formulará unha serie de
deafíos que porán a proba os coñecementos e habilidades dos
participantes na área de seguridade de sistemas e aplicacións.
Segundo
informa a axencia autonómica AMTEGA este concurso, organizado de
maneira conxunta pola Cátedra R en Ciberseguridade e o Centro
Tecnolóxico Gradiant no marco do evento Ciber.gal, ten como
requisitos para a súa inscrición sermos maior de idade, acudirmos
cun ordenador portátil propio e descubrirmos “o segredo” para
podermos participar, que consiste na resolución “dun sinxelo reto
de seguridade”. Na actividade participarán un número máximo de
30 persoas, que serán seleccionadas por orde de inscrición. É
preciso inscribirse previamente para poder participar neste
formulario.
AMTEGA
engade que cada proba deste concurso ten asignada unha puntuación en
función á súa dificultade. Existirá a posibilidade, en caso de
necesitarse, de solicitar pistas que descontarán puntos ao total da
proba en cuestión. Unha vez finalizado o tempo da actividade,
determinaranse os gañadores en función da súa posición na
clasificación. O primeiro e o segundo clasificado serán agasallados
con premios de 700 e 300€ respectivamente, sendo entregados os
mesmos na última xornada do encontro, o día 11 de novembro no
auditorio principal do Edificio Fontán. Ademais, ao finalizar o
concurso, tamén está previsto o sorteo entre todos os participantes
dun Huawei Watch GT2 Pro. Pódense
consultar as bases legais do concurso na web de Ciber.gal.
O
concurso Capture The Flag, explica
AMTEGA, “nace coa intención de que todos aqueles que
queiran, poidan por a proba as súas habilidades e a súa destreza á
hora de resolver problemas relacionados con temáticas como a
criptografía, o análise forense, o networking e o
reversing”. Nesta mesma liña, neste caso organizado pola
Cátedra R de ciberseguridade, celebrarase un obradoiro para a
detección, identificación e análise de ameazas en redes e
aplicacións o día 10 de novembro entre as 10h e as 14h, que
consistirá nun breve repaso conceptual á análise de malware
e ás técnicas de detección e eliminación de ameazas. Estas
técnicas exemplificaranse con casos de estudo prácticos.
A
actividade vai dirixida a estudantes de FP (módulo superior),
estudantes de cursos de especialización, e estudantes de grados e
mestrados universitarios en estudos afíns ás Tecnoloxías da
Información e as Comunicacións (as TIC). Será en modalidade
presencial, e tamén require dunha inscrición previa e asistir con
un portátil persoal. Celebrarase en tres sedes distintas á vez, no
Edificio Fontán en Santiago de Compostela, na Universidade da Coruña
e na Universidade de Vigo. Para cada unha delas, o aforo máximo
deste taller é de 20 persoas, e tamén serán asignadas as prazas
por orde de inscrición.