O Hub Audiovisual quere converter o noso sector do videoxogo nun referente mundial
luns, 29 de novembro do 2021
No
marco da nova edición de Culturgal, celebrada esta fin de semana no
Pazo da Cultura Pontevedra, presentáronse
as liñas principais de traballo do Hub Audiovisual, que está a
deseñar a Xunta de Galicia en colaboración coa asociación
Videoxogo.gal, sendo un dos seus obxectivos clave fortalecer este
sector e convertelo nun referente internacional.
O
director da Axencia das Industrias Culturais (AGADIC), Jacobo Sutil,
e Manuel Rey e Luz Castro, secretario e tesoureira de Videoxogo.gal,
foron os encargados de debullar as claves da iniciativa, na que
participan representantes de catro destacadas empresas galegas do
sector para abordan os proxectos que están a ultimar nestes
momentos: Intruder in Antiquonia, de Aruma Studios; The
Waylanders, de Gato Studio; Super Woden GP, de Víctor
Justo, e Rai, de Wood Games.
Sutil
destacou que os catro proxectos “son un reflexo do talento
creativo, técnico e empresarial arredor dos videoxogos en Galicia”,
razón pola que a Xunta traballa na primeira iniciativa autonómica
de fortalecemento e vertebración “dun sector con gran capacidade
de crecemento”, dixo. Trátase dun dos principais eixos do Hub
Audiovisual da Industria Cultural, que o Goberno galego acaba de
poñer en marcha e para o que conta cun orzamento de 9,6 M€ do
Fondo Europeo de Desenvolvemento Rexional (FEDER).
Segundo
engadiu, o sector dos videoxogos “será o destinatario dun polo de
aceleración empresarial e dun fondo específico para o
desenvolvemento de proxectos, ademais doutra serie de accións
transversais”. No caso do polo de aceleración, os
seus destinatarios serán os emprendedores e empresas novas para
contribuír a axilizar a saída ao mercado dos seus produtos e, en
consecuencia, a súa consolidación. Esta iniciativa materializarase
a través dun convenio ao abeiro do que se desenvolverán as dúas
edicións, cunha duración total de 20 meses desde a súa posta en
marcha. En canto ao fondo de desenvolvemento de videoxogos,
artellarase a través dunha liña de subvencións dotada con 400.000€
destinada ás produtoras galegas, tanto para o seu desenvolvemento
empresarial como para levar a cabo proxectos competitivos a nivel
global.