O ITG achega un software para optimizar o subministro ao consumidor de enerxías renovábeis
mércores, 20 de novembro do 2019
O
Instituto
Tecnolóxico de Galicia (ITG) desenvolveu unha ferramenta que permite
xestionar as microrredes que xeran a electricidade con enerxías
renovábeis, como sistemas fotovoltaicos ou eólicos. Ademais,
disto, a solución permite almacenar a enerxía en baterías e
integrar puntos de recarga de vehículos eléctricos, en edificios
residenciais e comerciais. Esta contribución tecnolóxica, baseada
na Internet das Cousas (IoT) a análise da información masiva (Big
Data), é a proposta de ITG desenvolvida no marco de AGERAR, un
proxecto europeo cuxos resultados foron dados a coñecer onte na
Escola Superior Técnica de Enxeñaría da Universidade de Sevilla.
O
software desenvolvido polo centro tecnolóxico galego xa foi probado
como ferramenta de seguimento e monitoraxe nas instalacións do
Instituto Nacional de Técnica Aeroespacial en Mazagón, Huelva,
actuando na súa microrrede experimental e permitindo mellorar a toma
de decisións sobre o funcionamento dos seus sistemas de enerxía
sustentábel. “Co traballo despregado no instituto”, sinalou o
ITG, “demostramos como o uso de sistemas de informacións baseados
en IoT, con alta capacidade de procesamento e de análise avanzada de
datos, contribúe a mellorar a toma de decisións na xestión desta
tipoloxía de microrredes, que son as infraestruturas encargadas de
solucionar a intermitencia da xeración renovábel de cara ao
consumidor, garantindo un fiábel fornecemento de electricidade”.
Os
demais socios do proxecto son a Universidade de Sevilla
(coordinador); INTA (Instituto Nacional de Técnica Aeroespacial); a
Axencia Andaluza da Enerxía; a Axencia Rexional de Enerxía e
Medioambiente do Algarve; a Universidade do Algarve; a Universidade
de Évora e o INEGI (Instituto de Ciencia e Innovación en Enxeñaría
Mecánica e Industrial).
“A
nosa solución tecnolóxica ten a capacidade de administrar grandes
volumes de datos, converténdose nun instrumento de gran utilidade
para a toma de decisións”, informa o ITG dende a súa sede da
Coruña, engadindo que “esta ferramenta IoT, baseada en estándares
internacionais, ofrece un gran potencial para os seus usuarios, xa
que inclúe diferentes tecnoloxías como estándares de comunicacións
(SWE, MQTT, MODBUS, BACnet, etc.), Big Data, modelos numéricos
e estatísticos, etc”.
O
proxecto europeo
A
plataforma de xestión avanzada de ITG desenvolveuse no marco do
proxecto AGERAR (Almacenamento e xestión de enerxías renovábeis
en aplicacións comerciais e residenciais) ao abeiro do programa
INTERREG V-A España - Portugal (POCTEP) 2014-2020, que ten como
obxecto promover a eficiencia enerxética e os criterios de
sustentabilidade en microrredes comerciais e residenciais,
incrementando o uso e mellorando a xestión de enerxías limpas
grazas aos sistemas de almacenamento e á utilización de Tecnoloxías
de Información e Comunicación (as TIC).
“Os
resultados das solucións materializadas conclúen AGERAR non só
axuda a aforrar enerxía; tamén contribúe a mellorar a calidade da
subministración eléctrica, a reducir a contaminación ambiental, a
mellorar a certificación enerxética dos edificios e a promover o
autoconsumo”, sinala o ITG.