O Ministerio de Economía recoñece o traballo de Altia na implantación de WECO
venres, 18 de xuño do 2021
O
Ministerio
de Economía e Empresa (MINECO) recoñeceu o traballo da empresa
tecnolóxica Altia na implantación de WECO. Trátase da
aplicación de tramitación administrativa electrónica que é
propiedade da Comisión Nacional dos Mercados e a Competencia (CNMC)
e que se implantou no MINECO coa colaboración da firma galega Altia.
A empresa con sede en Oleiros leva traballando neste proxecto, coa
CNMC, dende hai máis de cinco anos.
O
labor de Altia consistiu na implantación de todos os expedientes de
recursos, incluíndo a migración de datos da aplicación previa. Ao
abeiro desa liña traballo Altia salienta o desenvolvemento de
“integracións moi significativas”, como a integración de WECO
con GEISER (rexistro da AGE) e con Notific@ (notificacións
electrónicas).
Pola
“súa capacidade para mellorar a calidade da xestión de recursos
de telecomunicacións do Ministerio”, WECO recibiu un accésit do
Premio á Innovación na Xestión outorgado á Subsecretaría do
Ministerio de Asuntos Económicos e Transformación Dixital. O xurado
valorou esencialmente “a simplificación colaborativa que o plan
logrou”. Recoñeceuse tamén a creatividade, o impacto, a
sustentabilidade e a eficiencia e a complexidade, xa que o proxecto
contou coa colaboración de diferentes unidades, entre elas Red.es ou
a Secretaría Xeral TIC, ademais de actores externos (cidadáns,
operadores, CNMC ou o Defensor do Pobo), aplicando técnicas de
colaboración público-privada que permitiron, grazas á colaboración
coa CNMC, o uso dunha aplicación informática de xestión documental
sen custos máis aló da súa adaptación.