O Portal da Lingua informa de máis axudas de urxencia para as obras audiovisuais galegas
xoves, 15 de abril do 2021
O
Portal
da Lingua informou este 14 de abril das axudas aos contidos
audiovisuais integradas no Plan de Reactivación da Cultura da Xunta
e que veñen de ser ampliadas e modificadas para a súa aplicación
urxente. As subvencións a producións e coproducións
audiovisuais de contido cultural galego, dotadas con 2,5 millóns de
euros, incluíron un aumento significativo no ámbito das
curtametraxes, das películas rodadas integramente en galego, das
realizadas por mulleres, das de dirección novel cun orzamento non
superior a 1,5 millóns de euros, das dirixidas por profesionais
cunha discapacidade recoñecida de porcentaxe igual ou superior ao
33%, dos documentais cinematográficos ou dos traballos de animación
cun orzamento máximo de 2,5 millóns de euros.
No
marco do Plan de Reactivación da Cultura da Xunta, esta medida
aplícase “de maneira urxente” para intensificar, en palabras da
Xunta, “o apoio nesta serie de casos concretos, adaptándose así á
posibilidade aberta polo novo regulamento estatal de desenvolvemento
da Lei do Cine”.
Esta
modificación permitirá financiar con estas axudas entre un 75% e un
85% do importe subvencionábel das producións, fronte ao límite
legal anterior do 50%.
Ademais,
para as co-producidas con países iberoamericanos este máximo
elévase agora ao 60%, porcentaxe que ata o momento só era de
aplicación no caso das coproducións transfronteirizas no seo da
Unión Europea.
Xunto
con esta modificación, ábrese un prazo complementario dun mes para
a adaptación daquelas solicitudes xa presentadas no período
inicial, pechadas o pasado 15 de febreiro, así como para a admisión
de novos proxectos que encaixen nas novas categorías tipificadas na
resolución acabada de publicar.
A
Xunta lembra que estas subvencións á produción e coprodución
audiovisual son as de maior dotación económica dentro do programa
anual de axudas públicas a este sector que xestiona a Consellería
de Cultura, Educación e Universidade a través do departamento de
Industrias Culturais. O seu obxectivo é “continuar coa
dinamización do audiovisual galego nun momento de gran visibilidade
e no que, a pesar da crise sanitaria, está a conseguir manter os
niveis de actividade en canto a rodaxes e estreas”.