O Programa ÚNICO levará banda larga a 366 vivendas e empresas de Boqueixón
venres, 28 de outubro do 2022
O
delegado
do Goberno en Galicia, José Miñones, e maila subdelegada do Goberno
na Coruña, María Rivas, visitaron este venres 28 o concello coruñés
de Boqueixón, onde deron a coñecer os plans do Goberno para
dixitalizar o rural con conexión de alta velocidade, materializados
a través do Plan ÚNICO. No que respecta a Boqueixón, fixeron saber
que o Executivo central levará Internet de banda larga a 366
vivendas e empresas. Así llo fixeron saber ao alcalde de Boqueixón,
Manuel Fernández Munín, quen recibiu a Miñones e Rivas no
Consistorio.
O
rexedor agradeceulles “que viñeran a Boqueixón a presentarnos
algúns proxectos” e “informarnos sobre o estado de tramitación
de certos investimentos que temos solicitado de fondos Next
Generation e que son moi necesarios para o concello”.
Pola
súa banda, José Miñones reafirmou “o gran impacto que está a
ter o Plan de Recuperación, Transformación e Resiliencia do Goberno
nos pequenos municipios”, e engadiu que “Boqueixón é un exemplo
de como o Goberno fai chegar o Plan de Recuperación a todo o
territorio do noso país”.
Durante
o encontro, o delegado do Goberno avanzou que o Programa ÚNICO Banda
Larga (Único) posibilitará a conexión de alta velocidade de 163
puntos nos que se localizan 366 vivendas e empresas de Boqueixón.
“Estamos
a falar de garantir a conectividade máis de 300 Mbps á práctica
totalidade do territorio deste municipio, en 163 zonas que hoxe non
dispoñen deste tipo de cobertura, esencial no mundo actual”,
subliñou o delegado.
Pola
súa banda, o alcalde trasladoulle a problemática que se produce
coas operadoras á hora de darlle servizo á veciñanza. Miñones
admitiu a problemática e indicou que “agora se lles está a pedir
aos Concellos que identifiquen as vivendas que non teñen fibra coa
referencia catastral, para así tratar de solucionar ese problema en
próximas convocatorias”.