O Samsung Galaxy Tab presentarase o 2 de setembro

mércores, 25 de agosto do 2010 Marcus Fernández

O tablet de Samsung é un dos segredos peor gardados dos últimos meses, e finalmente o Samsung Galaxy Tab será presentado oficialmente o vindeiro 2 de setembro durante a feira IFA de Berlín, contando xa con páxina web oficial e un vídeo no que adiantan moitas das súas prestacións, coma serían unha pantalla de 7 polgadas cunha resolución de 1.024 x 600 píxeles, cámara de 3,2 Mpíxeles, cámara frontal QVGA para videoconferencia, GPS, 3G, Wi-Fi N, batería de 4.000 mAh, 16 Gb de almacenamento interno, sistema operativo Android 2.2 coa interface de usuario Touchwiz e soporte de Flash Player 10.1.
No vídeo promocional deste novo tablet podemos ver que dan importancia ao feito de que o trebello serve para gozar da realidade aumentada e as videoconferencias (elementos alleos ao seu principal competidor, o iPad) e tamén o feito de que integra un teclado Swype (que permite escribir sen levantar o dedo da pantalla táctil, axilizando a velocidade de tecleo).


Vídeo promocional do Samsung Galaxy Tab

PUBLICIDADE