O Zune HD prepara modelo de 64 Gb

luns, 29 de marzo do 2010 Marcus Fernández

Pese a que Microsoft continúa a deixar o seu reprodutor multimedia portátil relegado ao mercado norteamericano, o produto non está morto, como demostra o futuro Windows Phone 7 (sistema claramente inspirado no do Zune) e o feito de que vaia incrementar a capacidade do Zune HD cun novo modelo con 64 Gb de capacidade, que apareceu fugazmente na web do produto (actualmente a ligazón ao produto está desactivada).
O feito de que o modelo de maior capacidade de disco do Zune HD pase de 32 a 64 Gb facilitaría a comparación do reprodutor multimedia portátil de Microsoft co de Apple (coa salvedade de que non existe un Zune HD con só 8 Gb de disco, pois o seu modelo básico conta con 16 Gb de memoria interna).
Actualmente nos EE.UU. o Zune HD de 16 Gb ten o mesmo prezo que o iPod Touch de 8 Gb, mentres que o Zune HD de 32 Gb ten un prezo lixeiramente (20 dólares) máis barato que o iPod Touch da mesma capacidade, de xeito que sería de agardar que o Zune HD de 64 Gb tivese un prezo duns 359 dólares, ou pouco máis, para manter a competitividade desta familia de trebellos que aínda non ten data para o seu lanzamento europeo.

PUBLICIDADE