O alumnado da USC xa pode solicitar a súa certificación académica en formato electrónico
xoves, 8 de xuño do 2017
- Unha vista do Campus Vida de Santiago dende a Alameda
A
Universidade
de Santiago anunciou hoxe que os seus alumnos xa poden levar a cabo
as solicitudes das súas certificacións académicas a través do
formato dixital, “empregando os dispositivos que sexan da súa
preferencia e mediante o uso da sinatura electrónica”. Máis polo
miúdo, posibilítase efectuar a través de computador, smartphone
ou tableta, a solicitude, o pagamento e a obtención dos
certificados oficiais. Segundo sinala a USC, a certificación
electrónica pon en xogo meirandes rapidez e axilidade, “xa que a
agora é posíbel acceder e descargar en formato dixital o documento
dende a secretaría virtual”.
Ademais,
o servizo achegará unha ligazón á sede electrónica da USC onde
estará dispoñíbel de xeito permanente a súa certificación
persoal accedendo co código seguro de verificación (CSV).
A
USC lembra que o documento é válido para presentar ante calquera
institución, organismos ou empresa como acreditación dos estudos
cursados na institución académica compostelá, verificábel na sede
electrónica universitaria co CSV.
En
materia de seguridade, a USC sinala que as certificacións académicas
con sinatura electrónica son documentos seguros e comprobábeis polo
“que xa non será preciso compulsalos, procedemento que se
simplifica a través do código seguro de verificacións, o cal
permite comprobar o documento en web”.