O alumnado do Servizo de Audiovisuais de Lugo implicarase contra a violencia de xénero
xoves, 21 de novembro do 2019
A
Deputación de
Lugo, a través do Centro de Formación do Servizo de Audiovisuais
(antiga Fundación TIC), está a impulsar unha completa liña de
acción para celebrar o Día Internacional da Eliminación da
Violencia contra a Muller, este 25 de novembro. O programa, dado
a coñecer hoxe pola deputada da Muller e Igualdade, María Loureiro,
acompañada do alumnado do centro formativo do SdeA, leva consigo a
implicación de boa parte dos concellos da provincia (45 de 67). As
reivindicacións xa deron comezo este xoves, co despregue dunha
pancarta na fachada do pazo provincial, co lema Non é Non. O
groso das actividades concentrarase o día 25, a desenvolver en
colaboración estreita co Concello de Lugo.
O
Centro de Formación do Servizo de Audiovisuais da Deputación
involúcrase un ano máis na organización e difusión desta
iniciativa, polo que a comunidade de estudantes de primeiro de
Produción será a encargada de deseñar e dirixir a cuarta marcha En
Camiño contra as Violencias, unha andaina que terá continuidade
nas redes sociais (con material audiovisual diverso do SdeA) e á que
convidan a toda a cidadanía, tal e como se fixo nas tres edicións
anteriores con “grande éxito de participación”, segundo
explicou María Loureiro, engadindo que a marcha arrincará ás 11.30
horas do Centro de Formación, na rúa Frei Plácido Rei Lemos, onde
as e os participantes recibirán camisetas e paraugas negros co lema
da campaña.
Práctica
en escenario real
En
Camiño contra as Violencias recolle por cuarto ano consecutivo
as propostas do alumnado de 1º de Produción do Centro de Formación
do Servizo de Audiovisuais da Deputación, que se ocupará tamén do
desenvolvemento da marcha. Segundo se fixo saber hoxe, trátase da
súa primeira práctica nun escenario real, malia que levan só dous
meses de formación en novas tecnoloxías ao servizo das linguaxes
audiovisuais. “A actividade”, engadiu a deputada, “esíxelles
un complexo traballo de planificación e preprodución coa
organización de diversas actuacións e actividades, así como a
elaboración de todo o material”.