O prezo nos procedecementos de concorrencia competitiva aboca a Coremain a un axuste de emprego
luns, 19 de setembro do 2022
A
empresa tecnolóxica Coremain,
un dos grandes referentes galegos do sector, chegou este mes de
setembro a un punto de inflexión na súa andaina: unha encrucillada
na que a dirección da compañía tomou drásticas decisións en
materia de equipo humano motivadas “pola caída dos prezos nos
contratos, tanto do ámbito público como privado, que poñen en
perigo a calidade dos servizos e a retención de emprego en Galicia”.
Nun
comunicado sobre esta situación e as decisións tomadas, Coremain
confirma un axuste de emprego “para seguir apostando polos servizos
de valor”. O ERE extintivo materializarase nas vindeiras semanas.
Polo que respecta ao número de persoas ás que afectará este
proceso, a cifra está aínda por determinar, e no seu momento “será
comunicado os representantes dos traballadores”, confirmou a
dirección da empresa. A firma lembra que estas decisións ,
que“tentaron evitarse custase o que custase”, foron provocadas
polo forte axuste de prezos do mercado, que en combinación co
incremento dos custos laborais no sector TIC, fai imposíbel
continuar con determinados contratos no nivel de calidade polo que
sempre apostou e garantindo a satisfacción do cliente”.
Prezos
desproporcionados
A
dirección da empresa pon o foco no peso desproporcionado do prezo
nos procedementos de concorrencia competitiva, que “provocan unha
inviabilidade de certos contratos que Coremain non está disposta a
asumir, pois de facelo comportaría un empeoramento das condicións
laborais dos seus traballadores, á fuga de profesionais do sector
TIC fóra de Galicia ou á deslocalización do servizo fóra de
Galicia, algo que a empresa non estamos dispostos a asumir”. En
base a isto, a dirección da firma optou por axustar o seu persoal
para “acometer exclusivamente aqueles proxectos que ofrezan
economicamente a posibilidade de xerar emprego de valor en Galicia e
seguir así ofrecendo os seus servizos coa altísima calidade con que
o vén facendo desde hai máis de tres décadas.” Ao mesmo tempo, e
como estratexia de crecemento futuro, Coremain confirma que “vai
seguir apostando por produtos propios e de alto valor engadido, que
teñen un valor diferencial respecto dos ofrecidos no mercado e cos
que confía en volver recuperar o seu actual nivel de emprego”.
E
conclúen: “Confiamos e apostamos por un cambio de tendencia no
mercado para que o factor determinante na adxudicación dos contratos
sexa a garantía a longo prazo da calidade do servizo ofrecido, e non
só o prezo. Esta será a forma, tanto para Coremain como para o
conxunto do sector TIC, de seguir retendo o emprego en Galicia”.